एभिसी सेन्ट्रल जोन भलिबललाई २० लाखको प्रायोजन

काठमाडौं । पाँचौं संस्करणको एसियन भलिबल कन्फेडेरेसन (एभिसी) सेन्ट्रल जोन सिनियर पुरुष भलिबल प्रतियोगिताका लागि नेपाल सेटलाईट टेलिकमले प्रायोजन गरेको छ ।

काठमाडौंमा साउन अन्तिम साताबाट आयोजना हुने प्रतियोगिताको लागि नेपाल सेटलाईटले प्रायोजन गरेको हो । आयोजक नेपाल भलिबल संघले शनिबार नेपाल सेटलाईट टेलिकम प्रालिसँग सम्झौता गरेको छ ।

सम्झौता पत्रमा संघका अध्यक्ष मनोरन्जन रमण शर्मा र नेपाल सेटलाईट टेलिकम प्रालिका अध्यक्ष अस्मिता सुमार्गीले हस्ताक्षर गरे ।

सम्झौतासँगै नेपाल सेटलाईटले प्रतियोगिताको लागि २० लाख नगद उपलब्ध गराउने छ । नेपाल सेटलाईटले शनिबार नै संघलाई २० लाखको चेक हस्तान्तरण गरेको छ ।

यस प्रतियोगिताका लागि संघले यसअघि नेपाल उद्योग वाणिज्य महासंघसँग पनि प्रायोजन सम्झौता गरिसकेको छ । महासंघले प्रतियोगिताका लागि ४० लाख नगद उपलब्ध गराउने छ ।

प्रतियोगिता साउन ३२ देखि भदौ ८ गतेसम्म संचालन हुनेछ ।

एसियन भलिबल संघको संयोजनमा आयोजना हुने प्रतियोगितामा नेपालसहित बंगलादेश, माल्दिभ्स, अफगानिस्तान, किर्गिस्तान, तुर्किमिनिस्तान र उज्वेकिस्तानसहित ७ टोलीले प्रतिस्पर्धा गर्नेछन् ।