नेपाल र भारतबीचको मैत्रीपूर्ण भलिबल रद्द

काठमाडौं । नेपाल र भारतबीच तय भएको मैत्रीपूर्ण भलिबल खेल रद्द भएको छ । अन्तिम समयमा आएर भारतीय पक्षले नेपाल आउने नसक्ने जानकारी गराएपछि मैत्रीपूर्ण खेल रद्द हुन पुगेको हो ।

भारतको राष्ट्रिय पुरुष भलिबल टिम आगामी बुधबार काठमाडौं आउने कार्यक्रम तय भएको थियो । भारतीय टिमका लागि सबै व्यवस्था समेत मिलाईएको थियो । तर अन्तिम समयमा भारतीय खेलकुद मन्त्रालयले ब्यस्त कार्यतालिकाको कारण देखाउँदै भलिबल टिमलाई नेपाल जान रोक लगाएको हो ।

नेपाल भलिबल संघका उपाध्यक्ष कुमार राज सुबेदीले भारतसंगको मैत्रीपूर्ण खेल रद्द भएको पुष्टि गरे ।

‘आउने टिकटहरु सबै निश्चित भएको थियो । तर भारतबाट मन्त्रालयले रोक्ने भन्ने खबर आयो ।’ उनले खेलपाटीसंग भने ।

नेपाल भलिबल संघले साउन मसान्तमा काठमाडौंमा हुने एभीसी सेन्ट्रल जोन भलिबल प्रतियोगिताको तयारीका लागि भारतको राष्ट्रिय भलिबल टिमलाई तीन वटा मैत्रीपूर्ण खेलका लागि आमन्त्रण गरेको थियो ।

भारतको भलिबल संघले नेपालको निमन्त्रणालाई स्विकार गर्दै खेलको मिति समेत तय भएको थियो । सोही अनुसार साउन ९, १० र ११ गते मैत्रीपूर्ण खेल खेल्ने पक्का गरिएको थियो ।

एसियाली क्षेत्रको प्रतिष्ठित पुरुष भलिबल प्रतियोगिता एभीसी सेन्ट्रल जोन साउन मसान्तमा काठमाडौंमा आयोजना हुदैछ । प्रतियोगिताको तयारीका लागि नेपाली टिमले दैनिक प्रशिक्षण गरिरहेको छ । नेपाली टिमलाई डच प्रशिक्षक हान एबिङले प्रशिक्षण दिईरहेका छन् ।