ला लिगामा सबैभन्दा धेरै तलब पाउने एमबाप्पे, मेसीको पारिश्रमिक कति?

काठमाडौं। नयाँ सम्झौताको सबै विवरण सार्वजनिक नगरे पनि लिओनल मेसी इन्टर मियामीबाट ठूलो रकम कमाइरहेका छन्। अर्जेन्टिनाका यी विश्वकप विजेता हाल मेजर लिग सकर (एमएलएस) मा सबैभन्दा धेरै तलब पाउने खेलाडी हुन्।

त्यसैगरी ला लिगामा पारिश्रमिकको हिसाबले शीर्ष स्थानमा छन्, फ्रान्सेली सुपरस्टार किलियन एमबाप्पे। स्पेनिस लिगको शीर्ष २० खेलाडीमध्ये ११ जना नै रियल मड्रिडका हुन्।

क्लब फुटबलमा अहिले पैसाकै खेल चलिरहेको छ। युरोप छोडेर अमेरिका पुगेका मेसीको बैंक ब्यालेन्स भने घटेको छैन। उनले हालै मियामीसँग २०२८ सम्मको लागि नयाँ सम्झौता गरेका छन्।

क्लबले सम्झौताको सबै क्लज गोप्य राखे पनि मेसीले करिब १५० मिलियन पाउन्ड पाउने पक्का भएको छ। यो रकमभित्र उनको सन्न्यासपछि क्लबमा इक्विटी (स्वामित्वको हिस्सा) पाउने व्यवस्था पनि समावेश छ।

मेसीको वार्षिक तलब १२ मिलियन डलर रहेको बताइन्छ। चालु वर्षमा उनको कुल आम्दानी २ करोड डलरभन्दा बढी हुनेछ। १ अक्टोबरपछि सम्झौता नवीकरण भएकाले अझै आधिकारिक रूपमा दर्ता भएको छैन।

तर, एलएम १० (मेसी) नै एमएलएसको सबैभन्दा बढी पारिश्रमिक पाउने खेलाडी रहने निश्चित छ। लिगमा सबैभन्दा धेरै तलब पाउने अन्य खेलाडीहरूमध्ये मेसीका पूर्वबार्सिलोना सहकर्मीहरू पनि छन्।

सर्जियो बुस्केट्सले ८.८ मिलियन, जोर्डी आल्बाले ६ मिलियन र लुइस सुआरेजले १.५ मिलियन डलर पाउनेछन्। मेसीपछि दोस्रो स्थानमा छन्, दक्षिण कोरियाका सोन ह्युंग मिन, जसको वार्षिक पारिश्रमिक करिब ११.१५ मिलियन डलर छ।

ला लिगामा अहिले सबैभन्दा धेरै तलब पाउने खेलाडी बनेका छन्, एमबाप्पे। रियल मड्रिडबाट उनी हप्तामा ६ लाख पाउन्डभन्दा बढी कमाउँछन्। उनको पछि छन्, रियलका अर्को स्टार डेविड अल्बा, जसले करिब साढे ४ लाख पाउन्ड पाउँछन्।

ब्राजिली भिनिसियस जुनियरको मासिक तलब पनि ४ लाख पाउन्डभन्दा बढी छ। हालै एल क्लासिकोमा प्रतिस्थापन भएपछि प्रशिक्षक जाबी अलोन्सोसँग मनमुटाव भए पनि पछि उनले माफी मागेका छन्।

त्यसबीच मड्रिड क्लबले उनको नयाँ सम्झौताबारे पनि छलफल थालेको बताइन्छ। सम्झौता नवीकरण भएमा भिनिसियसले अल्बालाई समेत पछि पार्नसक्ने सम्भावना छ।

ला लिगामा यो वर्षका शीर्ष २० तलब पाउने खेलाडीमध्ये ११ जना रियलका हुन्। यो सूचीमा जुड बेलिङ्घम र रोड्रिगो पनि छन्। बार्सिलोनाबाट ७ जना खेलाडी छन्। शीर्ष पाँचमा रहेका छन्, रोबर्ट लेवान्डोव्स्की। शीर्ष १० भित्र फ्रेन्की डि योङ, राफिन्हा र लामिन यमल पनि छन्।