सरकारलाई दोषी देखाएर पन्छिए एन्फा पदाधिकारी

काठमाडौं। नेपालको फुटबल फेरि पनि उही पुरानो समस्यामा अल्झिएको छ—लिग नचल्नु, क्लबको असन्तुष्टि, आर्थिक संकट र व्यवस्थापनको कमी।

तर, बिहीबार खेलकुद मन्त्रालयमा मन्त्री बब्लु गुप्तासँग भएको छलफलमा देखिएको दृश्यले भने एउटा नयाँ प्रश्न उठाएको छ— के अखिल नेपाल फुटबल संघ (एन्फा) आफैं आफ्नो जिम्मेवारीबाट पन्छिँदै सरकारलाई दोष थोपर्दैछ?

लिग रोकिँदा दोषको खेल

एन्फा महासचिव किरण राईले मन्त्रालयमा गरिएको छलफलमा लामो भाषण दिए। उनले लिग ढिलो हुनुका कारण क्लबबीचको राजनीतिक द्वन्द्व, आर्थिक अभाव र सरकारी सहयोग नहुँनु बताए।

राईले भने, ‘पूर्वखेलकुद मन्त्रीलाई लिग गर्न ५ करोड माग गरेका थियौं। तर, ४० लाख रुपैयाँ दिनुभएको छ। त्यो रकम अपुग छ। अर्को कुरा फिफा र एएफसीबाट आउने रकम लिगमा खर्च गर्न मिल्दैन। त्यसैले बिना सरकारी सहयोग लिग सम्भव छैन।’

उनले ‘ए’ डिभिजनदेखि ‘सी’ डिभिजनसम्मका ढिलाइका कारणहरू क्लब र प्रणालीमा देखिए पनि मूल कारण सरकारले पर्याप्त स्रोत नदिएको बताए।

तर, एन्फा आफैंले गत दुई वर्षदेखि लिग सञ्चालनमा निरन्तरता दिन नसक्दा राष्ट्रिय खेलकुद परिषद् (राखेप)ले दिँदै आएको २५ लाख सहयोग गुमाएको कुरामा उनी मौन रहे। चार महिनाअघि मात्र ‘बी’ डिभिजन सकिएको र अब ‘ए’ डिभिजन सुरु गर्न तयारी भइरहेको उनले बताए। तर, क्लबहरूले भने तयारीका लागि कम्तीमा १० महिना समय मागेको उनको जिकिर छ।

यो अवधिमा नेसनल लिग गर्ने वा शहीद स्मारक लिग गर्ने भन्नेमा पनि अझै अनिश्चितता छ। यति लामो ढिलाइको कारण बुझाउँदा एन्फा पदाधिकारीहरूले सरकार, कर प्रणाली, भिसा प्रक्रिया र रंगशालाको कमजोरीलाई मुख्य कारण रहेको दाबी गरे।

एन्फाका सीईओ तथा संकटा क्लबका अध्यक्ष इन्द्रमान तुलाधारले पनि आफ्नो धारणा राख्दै सरकारलाई नै दोष लगाए। ‘एक क्लब चलाउन डेढदेखि दुई करोड खर्च लाग्छ, तर सरकारले शून्य लगानी गर्छ,’ उनले भने, ‘हामी फिफा–एएफसीको सहयोगले मात्रै टिकेका छौं, तर त्यो रकम विकास परियोजनामा जान्छ, लिग सञ्चालनमा होइन।’

तुलाधारका अनुसार क्लबहरू अब ‘होम एन्ड अवे’ फर्म्याटमा लिग खेल्न चाहन्छन्। तर, त्यसका लागि १० वर्षे ग्राउन्ड लिज, कर छुट र भिसा प्रक्रिया सजिलो हुनुपर्ने माग राखिएको छ।

तर, उनी पनि अर्को पक्ष स्वीकार गर्छन्। क्लबहरूले आफैंले पनि १२ महिनासम्म खेलाडी व्यवस्थापन गर्न सकेका छैनन्। ‘मेरो क्लबसँग दुई वर्षदेखि पहिलो डिभिजनका खेलाडी छैनन्,’ उनले स्पष्ट रूपमा भने। यसको अर्थ क्लब र एन्फा दुवै संरचनात्मक रूपमा कमजोर छन्। यसको जिम्मेवारी दुवैले बाँड्नुपर्ने हो।

तुलाधारले रंगशालाको अवस्थालाई फुटबलको ठूलो अवरोधका रूपमा चित्रण गरे। ‘हाम्रो रंगशालामा जिम, जुडो र अन्य गतिविधि हुन्छन्। ब्रोडकास्टिङ रुममा जुडो हुन्छ,’ उनले भने।