वीरबहादुरले स्पष्टीकरण दिँदै भने- महासचिव राईलाई निलम्बन गरियोस्

काठमाडौं। अखिल नेपाल फुटबल संघ (एन्फा) का वरिष्ठ उपाध्यक्ष वीरबहादुर खड्काले महासचिव किरण राईलाई निलम्बन गर्न अध्यक्ष पंकजविक्रमलाई औपचारिक रूपमा आग्रह गरेका छन्।

उनले अध्यक्षलाई सम्बोधन गर्दै बिहीबार पेश गरेको लिखित स्पष्टीकरणमा आफूले कुनै पनि गलत कार्य नगरेको र उल्टै महासचिवकै गतिविधिले संघको निर्णय र फुटबलको प्रणालीमा अवरोध पुगेको दाबी गरेका छन्।

खड्काले भनेका छन्,‘नेपाली फुटबललाई जीवन्त राख्न र विधि, विधान तथा पद्दतीपूर्वक सञ्चालन गर्न महासचिव नै बाधक बनेका छन्। त्यसैले निजलाई निलम्बन गर्ने मेरो निर्णय कार्यान्वयन होस भन्ने समेत अनुरोध गर्दछु।’

एन्फा अध्यक्ष नेम्वाङले आइतबार संघको पहिचानलाई कमजोर बनाएको, आन्तरिक विषयहरुमा गोपनियता कायम नराखेको, संघको विधान विपरित अनाधिकृत रुपमा संघका पदाधिकारीविरुद्ध सामाजिक सञ्जाल, आमसञ्चार माध्यमहरुको प्रयोगगरि गलत अफवाह फैलाएको जस्ता अनैतिक कार्यहरु गरेको आरोप लगाउँदै वरिष्ठ उपाध्यक्ष खड्कासँग लिखित स्पष्टीकरण मागेका थिए।

त्यसैअनुसार खड्काले बिहीबार स्पष्टीकरण बुझाएका हुन्। उनले स्पष्टीकरणमाअध्यक्षको अनुपस्थितिमा एन्फा विधानको धारा ४४(२) र धारा ४२( (६) अनुरुपको जिम्मेवारी सम्हालेको जिकिर गरेका छन्। त्योअनुसार विधानविपरित कुनै कार्य नगरेको उनको भनाइ छ।

‘एन्फा विधानको धारा ४४ (२) र धारा ४२ (६) अनुरुपको जिम्मेवारी सम्हालेको बखत संघको लेटरहेड, छाप, च.नं. लगायतका कार्यहरु तथा सामग्रीहरु संघकै कार्यलयमा रही प्रयोगमा ल्याएको हो। संघको विधिको शासनमा विश्वास गर्दछु भनी पत्र मै लेखिएको हुँदा मेरो व्यक्तिगत मान्यता पनि संघको विधिको शासनमा सञ्चालन हुने रहेकोले विधिविधान बमोजिमको कार्य गरेको हुँदा वा जिम्मेवारी सम्हाल्दा व्यक्तिगत सम्पर्क गर्नुपर्ने वा नपर्ने भन्ने विषयवस्तु गौण हुने स्मरण गराउँदछु,’ उनले भनेका छन्।

आफू कार्यवाहक रहँदा गरेको कार्य पूर्णतः विधान बमोजिमको अधिकार र जिम्मेवारीअन्तर्गत भएकोले अविश्वनियता वा भ्रम उत्पन्न हुने अवस्था नरहेको खड्काको जिकिर छ।

गत कार्तिक २ गते खड्काले कार्यवाहक अध्यक्षको हैसियतमा महासचिव राईलाई निलम्बन गरेका थिए। अझ तीन दिनभित्र लिखित स्पष्टीकरण दिनसमेत पत्र काटेका थिए। त्यसको सात दिनपछि अध्यक्ष नेम्वाङले खड्कालाई तीन दिनभित्र जवाफ दिनुपर्नेसहित अर्को स्पष्टीकरण सोधेका थिए।

यस्तो छ उनको लिखित स्पष्टीकरण

उपरोक्त सम्बन्धमा तपाईँद्वारा हस्ताक्षरित पत्र प्राप्त भई व्यहोरा अवगत भएको छ। म हाल अखिल नेपाल फुटबल संघ (एन्फा) को वर्तमान कार्यसमितिको वरिष्ठ उपाध्यक्षको हैसियतमा कार्यरत छु।

मबाट संघको गरिमा कमजोर पार्ने, आन्तरिक विषयहरूमा गोपनीयता कायम नगर्ने, पदीय आचरण र मर्यादा उल्लंघन गर्ने, तथा संघको विधानविपरीत अनधिकृत रूपमा पदाधिकारीहरूविरुद्ध सामाजिक सञ्जाल वा सञ्चार माध्यममार्फत गलत अफवाह फैलाउने जस्ता कार्यहरू कदापि भएका छैनन् र भविष्यमा पनि हुने छैनन्।

पत्रमा उल्लेख भएअनुसार, गत वर्षको सहिद स्मारक ‘सी’ डिभिजन लिग–२०८० का विभिन्न खेलहरूमा मिलेमतो भएको आरोप लगाइएको विषयमा म स्पष्ट पार्न चाहन्छु— सो सम्बन्धी क्लबहरूको उजुरी अहिले पनि एन्फा अनुशासन समितिमा विचाराधीन रहेको बुझिन्छ, तर म स्वयंलाई आजको मितिसम्म एन्फा वा सो समितिबाट कुनै औपचारिक जानकारी प्राप्त भएको छैन।

मैले कुनै क्लबमाथि व्यक्तिगत रूपमा आरोप लगाएको होइन। सञ्चार माध्यम र सामाजिक सञ्जालमा आएका समाचारका आधारमा सत्यतथ्य जानकारी लिन र आवश्यक परे अनुसन्धान अघि बढाउनका लागि मात्र फिफासम्म पत्राचार गरेको हुँ। यो कदम मेरो पदीय जिम्मेवारी र नेपाली फुटबलको हितप्रति चिन्तित भएर उठाइएको हो।

त्यसैले, संघबाट प्राप्त पत्रमा उठाइएका विषयहरूको जवाफ म यसरी बुँदागत रूपमा पेश गर्दछुः

१) अध्यक्षको अनुपस्थितिमा मैले एन्फा विधानको धारा ४४(२) र धारा ४२(६) बमोजिम कार्यवाहक अध्यक्षको जिम्मेवारी सम्हालेको हुँ। त्यस क्रममा मैले कुनै पनि विधानविपरीत कार्य गरेको छैन।

२) कार्यवाहक रहँदा प्रयोग गरिएका संघका लेटरहेड, छाप, पत्र संख्या र अन्य सामग्रीहरू संघकै कार्यालयमा रहेर वैधानिक रूपमा प्रयोग गरिएका हुन्।

संघको विधिको शासनमा विश्वास राख्ने व्यक्ति भएकाले मैले सम्पूर्ण कार्य विधि–विधानअनुसारै गरेको हुँ। त्यसैले जिम्मेवारी वहनका क्रममा व्यक्तिगत सम्पर्क आवश्यक थियो वा थिएन भन्ने विषय गौण ठहरिन्छ।

३) कार्यवाहक अवधिमा मबाट गरिएका सबै कार्यहरू पूर्ण रूपमा विधानद्वारा तोकिएका अधिकार र जिम्मेवारी अन्तर्गतकै हुन्। त्यसैले कुनै प्रकारको अविश्वसनीयता वा भ्रम उत्पन्न हुने अवस्था छैन।

४) एन्फाको लेटरहेड र छाप मसँग कसरी पुगे भन्ने प्रश्नमा पुनः स्पष्ट पार्न चाहन्छु— म एन्फाको वरिष्ठ उपाध्यक्ष तथा कार्यवाहक अध्यक्षको हैसियतमा विधानअनुसार कार्यरत थिएँ। संघको कार्यालय, सामग्री र कार्य सञ्चालनमा मेरो प्रत्यक्ष पहुँच तथा जिम्मेवारी थियो। सोही हैसियतमा मैले वैधानिक रूपमा प्रयोग गरेको हुँ।

५) एन्फाको छाप र लेटरहेड मबाट कहिल्यै दुरुपयोग भएको छैन र भविष्यमा पनि हुने छैन। माथि कारवाही हुनुपर्ने कुनै औचित्य छैन, बरु मैले विधानको धारा ४२(२) र ४४(६) बमोजिम प्राप्त अधिकार प्रयोग गरी वैधानिक कार्य गरेको हुँ।

६) एन्फा विधानको धारा ९(१) अनुसार पदाधिकारीहरूले फिफा, एएफसी र एन्फाको विधान, नियम, निर्देशन, निर्णय तथा आचारसंहिता पालना गर्नुपर्ने उल्लेख छ। मैले सोही अनुसार कार्य गरेको हुँदा संघविरोधी गतिविधि गरेको भन्ने कुरा निराधार हो।

एन्फाको सर्वोच्च निकाय एन्फा कङ्ग्रेस (साधारण सभा) ले सहिद स्मारक ए डिभिजन लिगसम्बन्धी गरेको निर्णय अध्यक्ष अनुपस्थित र म कार्यवाहक अध्यक्षको जिम्मेवारीमा रहँदा पारित भएको थियो। तर महासचिवले कार्यसमिति वा कार्यवाहक अध्यक्षलाई जानकारी नदिई एकतर्फी रूपमा उक्त निर्णय कार्यान्वयन हुन नसक्ने भनी सार्वजनिक अभिव्यक्ति दिएका छन्, जुन विधानविपरीत कार्य हो।

त्यसैले, मैले महासचिवसँग सो को कारणबारे स्पष्टिकरण मागेको थिएँ। तर उनले जवाफ नदिएपछि विधानको धारा ३५, धारा ४२(२क), र धारा ९(१) अनुसार निलम्बन प्रक्रिया अघि बढाइएको हो। विधान कार्यान्वयन गर्ने र विधिको शासन कायम राख्ने जिम्मेवारी वरिष्ठ उपाध्यक्षको नाताले मैले निभाएको हुँ। त्यसैले ममाथि कुनै कारवाहीको औचित्य छैन।

महासचिवको अधिकार र जिम्मेवारी एन्फा विधानको धारा ६६(१) तथा ६६(३)(क) मा स्पष्ट रूपमा तोकिएको छ— सचिवालयको प्रमुखको हैसियतमा कार्य गर्ने र अध्यक्षको निर्देशनमा साधारण सभा तथा कार्यसमितिको निर्णय कार्यान्वयन गराउने।

तर वर्तमान महासचिवले कुनै पनि कानुनी अधिकारबिना पत्रकार सम्मेलनमार्फत साधारण सभाको निर्णय वदर गर्ने घोषणा गरेका छन्, जुन विधानको स्पष्ट उल्लङ्घन हो।

साधारण सभाले गरेको निर्णय अध्यक्ष वा कार्यसमितिले समेत वदर गर्न नसक्ने हुँदा महासचिवको उक्त कदमले एन्फाको गरिमा र विधि शासन दुवैलाई हानी पुर्‍याएको छ। त्यसैले, म तपाईँ (अध्यक्ष) सँग अनुरोध गर्दछु महासचिवमाथि आवश्यक कारवाही गरी एन्फा साधारण सभाको गरिमा कायम राखियोस्।

नेपाली फुटबललाई जीवन्त राख्न र संघलाई विधि, विधान तथा प्रणालीपूर्वक सञ्चालन गर्न महासचिवको वर्तमान व्यवहार बाधक बनेको स्पष्ट भएकाले, मैले गरेको निलम्बनसम्बन्धी निर्णय कार्यान्वयन गर्न अनुरोध गर्दछु।

भवदीय,

वीरबहादुर खड्का

वरिष्ठ उपाध्यक्ष

अखिल नेपाल फुटबल संघ (एन्फा)