रियल छोड्न चाहन्छन् भिनिसियस!

काठमाडौं। एल क्लासिकोमा बार्सिलोनालाई हराए पनि रियल मड्रिडको ड्रेसिङ रुममा भने उत्साहको माहोल केही कम देखियो। कारण स्पष्ट छ, मुख्य प्रशिक्षक जाभी अलोन्सो र भिनिसियसबीचको विवाद।

खेलपछि अलोन्सोले ब्राजिलियन स्टारसँग छुट्टै कुरा गर्ने बताएका थिए। गत सिजनको कुनै पनि एल क्लासिकोमा बार्सिलोनालाई पराजित गर्न नसकेको रियलले यसपटक अलोन्सोको प्रशिक्षणमा पहिलो खेलमै जित हात पारेको छ।

लस ब्लान्कोसले बार्सिलोनालाई २–१ गोलले हरायो। तर, खेलको ७२औं मिनेटमा जब अलोन्सोले भिनिसियसलाई परिवर्तन गरे, त्यतिबेला उनले निकै रिसयुक्त प्रतिक्रिया जनाए।

यही कारणले अलोन्सोले खेलपछि भिनिसियससँग व्यक्तिगत रूपमा छलफल गर्ने बताएका हुन्। तर, त्यतिमै सीमित रहेन विषय। मैदानबाट बाहिरिँदा जब उनले साथी रोड्रिगोसँग हात मिलाए, उनले सहायक प्रशिक्षक सेबास पारियोलाई भने,‘यदि म टिमबाट गएर टिम राम्रो हुन्छ भने, म टिम छोड्छु।’

त्यसपछि उनी सिधै ड्रेसिङ रुमतिर हिँडे।

खेलपछि यस्तो अवस्थाले रियलको क्लासिको जितको खुसीलाई नरमाइलो बनाइदियो। अब प्रश्न यो उठेको छ– भिनिसियसले यो कुरा रिसको झोकमा भनेका हुन् कि साँच्चै क्लब छोड्न चाहन्छन्?

यद्यपि, प्रशिक्षक अलोन्सोले बार्सिलोनाविरुद्ध भिनिसियसको प्रदर्शनको प्रशंसा गरेका छन्। उनले खेलाडीको व्यवहारबारे विस्तृत रूपमा कुरा गर्ने बताएका छन्।