एन्फा प्रेसिडेन्ट लिगको उद्घाटन खेलमा चित्लाङ र देउराली भिड्ने

काठमाडौं। ‘एन्फा प्रेसिडेन्ट लिग २०२५’ को उद्घाटन खेलमा चित्लाङ एफसी र देउराली युथ क्लब भिड्ने भएका छन्।

अखिल नेपाल फुटबल संघ (एन्फा)का अनुसार मकवानपुरको हेटौँडास्थित गौरीटार रंगशालामा हुने यो प्रतियोगिता साउन ४ गतेदेखि सुरु हुनेछ।

मकवानपुर जिल्ला फुटबल संघको संयोजनमा आयोजना हुने यो लिगमा सहभागी १० टोलीलाई दुई समूहमा विभाजन गरिएको छ।

समूह ‘ए’ मा जनजागृति युवा क्लब, चित्लाङ एफसी, विजय स्पोर्ट्स क्लब, लालिगुराँस एसोसिएसन क्लब र देउराली युथ क्लब छन्।

त्यस्तै, समूह ‘बी’ मा नपजागृति क्लब, ह्यारेन्स क्लब, टाइगर्स टिम, गाईघाट एफसी र काँक्रेबिहार युथ क्लब रहेका छन्।

उद्घाटन दिन पहिलो खेल दिउँसो १२:१५ बजे चित्लाङ एफसी र देउराली युथ क्लबबीच हुनेछ भने दोस्रो खेल ३:१५ बजे विजय स्पोर्ट्स क्लब र लालिगुराँस एसोसिएसन क्लबबीच खेलिनेछ।