मलेसियासँगको हारलाई जितमा बदल्न एन्फाले हाल्यो उजुरी

काठमाडौं। अखिल नेपाल फुटबल संघ (एन्फा)ले एएफसी एसियन कप छनोटमा मलेसियासँगको २–० को हारलाई ३–० जितमा बदल्न फिफामा उजुरी दर्ता गरेको छ। एन्फाले खेलमा मलेसियाले अवैध खेलाडी प्रयोग गरेको दाबी गरेको छ।

नेपालले मार्च २५ मा सुलतान इब्राहिम स्टेडियममा घरेलु टोलीसँग २–० को हार बेहोरेको थियो। उक्त खेलमा हेक्टोर हेभेल र लावेरे कोर्बिन–ओङ्गले गोल गरेका थिए।

तर, सेप्टेम्बर २६ मा फिफाले मलेसियाको फुटबल संघ (एफएएम) लाई सात नेचुरलाइज्ड खेलाडीका कागजातमा जालसाजी गरेको आरोपमा कारबाही गरेको थियो, जसमा हेभेल पनि रहेका थिए।

फिफाको अनुशासनात्मक निर्णय भने मलेसियाको भियतनाममाथिको ४–० जितमा मात्र लागु गरिएको थियो। यसपछि एन्फाले आफ्नो खेलको नतिजा पनि उल्टाउन माग गरेको हो।

द गाजियन गार्जियनले भनेको छ,‘अखिल नेपाल फुटबल संघले मलेसियाविरुद्ध उजुरी दर्ता गरेको छ। मार्चमा मलेसियाले हात पारेको २–० को जितमा गोल गर्ने हेभेल अवैध ठहरिएपछि खेलको नतिजा उल्टिन सक्नेछ।’

चार खेलपछि नेपाल समूह ‘एफ’को तल्लो स्थानमा अंकविहीन अवस्थामा रहँदै प्रतियोगिताबाट बाहिरिइसकेको छ। नेपालले लाओस २–१ र भियतनाम ३–१ र १–० को हार बेहोरेको थियो।

मलेसिया अपराजित रहँदै १२ अंकसहित समूहको शीर्ष स्थानमा छ। ९ अंक पुर्‍याएको भियतनामको भने अघिल्लो चरणमा पुग्ने सम्भावना अझै जीवितै छ। यस्तो अवस्थामा प्रतियोगिताको नियमावलीअनुसार नै नतिजा उल्टिने एन्फा प्रवक्ता सुरेश शाह बताउँछन्।

‘प्रतियोगिता सञ्चालन गर्नुपूर्व नै एक नियमावली बनाइएको हुन्छ। उक्त नियमावलीलाई सबैले मानन्नुपर्ने हुन्छ। त्यसमा उल्लंघन हुन्छ भने प्रतियोगिताको नियमावलीअन्तर्गत नै हामीले स्वत: अंक पाउने छौं,’ उनले खेलपाटीसँग भने। नेपालले अब नोभेम्बर १८ मा मलेसिया र मार्च ३१ मा लाओससँग दोस्रो लेग खेल्दै प्रतियोगिता टुंगाउने छ।

फिफाको कारबाहीले मलेसियाली फुटबल संकटमा पार्दैछ। जरिवानासहित हेभेलसहित जोआओ फिगुएरेडो, रोड्रिगो होल्गाडो, इमानोल माचुका, फाकुन्डो गार्सेस, जोन इराजाबाल र ग्याब्रियल पाल्मेरो सात नेचुरलाइज्ड खेलाडीलाई सेप्टेम्बर २६ देखि एक वर्षका लागि फुटबल गतिविधिबाट प्रतिबन्ध लगाइएको छ।

फिफा अनुशासन समिति अनुसार एफएएमद्वारा पेश गरिएका जन्म प्रमाणपत्र र फिफाले प्राप्त गरेको मूल प्रमाणपत्रमा मेल खाएको थिएन। फिफाका अनुसार खेलाडीका हजुरबुबा–हजुरआमा मलेसियामा जन्मेका थिएनन्।

प्रतियोगिता नियमअनुसार एएफसीको निर्णय पर्खँदै मलेसियाले भियतनाम र नेपालविरुद्ध हात पारेको नतिजा ३–० को पराजयमा बदलिन सक्नेछ। एफएएमले भने यसलाई प्रशासनिक त्रुटि मात्र भएको र खेलाडीहरू वैध नागरिक भएको दाबी गर्दै आएको छ।

फिफाको अपिल समिति सामान्यतया ३०–६० दिनभित्र मुद्दा प्रक्रिया गर्छ। तर, मलेसियाको जस्तो जटिल मामिला तीन महिनासम्म पनि लाग्न सक्छ। अपिल अस्वीकृत भएमा एफएएमलाई पूर्ण निर्णय रिपोर्टको लागि १० दिन र यसलाई कोर्ट अफ आर्बिट्रेसन फर स्पोर्ट्स (सीएएस)मा लैजान २१ दिन दिइनेछ। सीएएसले औसत ५–६ महिना समीक्षा गर्छ।

छनोटका खेल मार्च ३१, २०२६ मा सकिने भएकाले एएफसी र सीएएस दुवैलाई समयमै निर्णय गर्न दबाब छ।