१५५औं वरीयताको देशमाथि अर्जेन्टिनाको ६ गोल

काठमाडौं। युरोपेली राष्ट्रहरू अहिले विश्वकप छनोट खेलिरहेका छन्। दक्षिण अमेरिकी क्षेत्रका राष्ट्र भने मैत्रीपूर्ण खेल खेलिरहेका छन्। यी क्षेत्रका राष्ट्रले आफ्नो छनोट चरण पहिले नै सम्पन्न गरिसकेका कारण फुर्सदमा रहेका हुन्।

त्यसक्रममा बुधबार अर्जेन्टिनाले पोर्तो रिकोलाई ६–० को विशाल अन्तरले पराजित गरेको छ। अर्जेन्टिनाका लाउटारो मार्टिनेज र एलेक्सिस म्याक अलिस्टारले दुई–दुई गोल गरे। गन्जालो मोन्टिएलले एक गोल जोडे। अर्को गोल आत्मघाती थियो।

खेलमा लिओनल मेसीले दुई असिस्ट गरे। योसँगै उनले अन्तर्राष्ट्रिय फुटबलमा सर्वाधिक असिस्ट गर्ने खेलाडीको नयाँ कीर्तिमान कायम गरे। अमेरिकाको चेस स्टेडियममा भएको खेलमा अर्जेन्टिनाले बलियो टोली उतारेको थियो।

खेलभरि नै ‘अल्बिसेलेस्टे’हरूले रिकोमाथि पूर्ण नियन्त्रण राखे। बल पोजेसनदेखि आक्रमणसम्म धेरै अघि रहे। स्मरण रहोस् अर्जेन्टिना फिफा वरीयतामा तेस्रो स्थानमा छ भने रिको १५५औं स्थानमा छ।

पहिलो हाफमा तीन र दोस्रो हाफमा तीन गोल भएका थिए। खेलको १४औं मिनेटमा म्याक अलिस्टारले डिबक्सभित्र निको गोंजालेजको हेड पासमा गोल गर्दै खाता खोले। २३औं मिनेटमा दोस्रो गोलमा मेसीले असिस्ट गर्दै इतिहास रचे।

यसअघि अन्तर्राष्ट्रिय फुटबलमा मेसीले अमेरिकाका ल्यान्डन डोनोभान र ब्राजिलका नेयमारसँग कीर्तिमान बराबरी गरेका थिए। यो खेलपछि उनी सर्वाधिक असिस्टकर्ता बने। अब मेसीको अन्तर्राष्ट्रिय असिस्ट संख्या ६० पुगेको छ।

३६औं मिनेटमा म्याक अलिस्टारले दोस्रो गोल गर्दै पहिलो हाफमै अर्जेन्टिनालाई ३–० को अग्रता दिलाए। दोस्रो हाफको सुरुमै प्रशिक्षकले केही परिवर्तन गरे र ६४औं मिनेटमा आत्मघाती गोलका कारण अन्तर थपियो।

अन्तिमतिर बदलिएका खेलाडी लाउटारो मार्टिनेजले लगातार दुई गोल थपे। ८४औं मिनेटमा मेसीको ब्याकहिल पासमा मार्टिनेजले गोल गर्दै स्कोर ६–० बनाए।