राष्ट्रिय टोलीको अर्को खेल बाँकी रहँदै रियल फर्किँदै एमबाप्पे

काठमाडौं। विश्वकप छनोटमा फ्रान्सले अजरबैजानलाई ३–० ले हराएपछि टोलीले अब अर्को खेल सोमबार आइसल्यान्डविरुद्ध खेल्ने तयारी गरिरहेको छ। तर फ्रान्सका मुख्य स्ट्राइकर किलियन एमबाप्पे त्यस खेलमा खेल्ने छैनन्।

अजरबैजानविरुद्धको खेलमा उनले एक गोल गरे पनि ८३औं मिनेटमा चोटपछि मैदान छोड्नुपर्‍यो।

अघिल्लो खेलमै थिएरी अन्रीलाई उछिन्दै फ्रान्सका दोस्रो सर्वाधिक गोलकर्ता बनेका एमबाप्पेले अजरबैजानविरुद्धको खेलमा आफ्नो गोल संख्या ५३ पुर्‍याए। अहिले उनी ओलिभर जिरुडभन्दा पाँच गोलले पछाडि छन्। जिरुडले फ्रान्सका लागि १३७ खेलमा ५७ गोल गरेका छन् भने एमबाप्पे ८९ खेलमै ५३ गोल पुर्‍याइसकेका छन्।

तर, जिरुडलाई पछ्याउने उनको यात्रा अहिले रोकिन लागेको छ। भिल्लारियलविरुद्ध क्लब खेलमा लागेको दायाँ खुट्टाको एडीको चोट अझै निको नभएकाले अजरबैजानविरुद्धको खेल पनि जोखिमपूर्ण थियो।

अन्ततः उनले खेले पनि उही ठाउँमा फेरि चोट लागेपछि अवस्था थप संवेदनशील बनेको छ।

फ्रान्सका प्रशिक्षक डिडिएर डेसच्याम्पले भने,‘उनको दायाँ एडीमा पुनः चोट लागेको छ। अघिल्लो चोटकै ठाउँमा पुनः चोट परेकाले संवेदनशीलता बढेको हो। अब हामी परीक्षण गरेर पूर्ण मेडिकल रिपोर्ट लिनेछौं।’

फ्रान्सको खेल सकिएपछि अब एमबाप्पे रियल मड्रिड फर्किँदैछन्, जहाँ उनको विस्तृत स्वास्थ्य परीक्षण हुनेछ। फ्रान्सेली पत्रिका एल इक्युपेका अनुसार उनको चोटको गम्भीरता परीक्षणपछि मात्रै स्पष्ट हुने बताइएको छ।