लिग खेल्न जोर्डन पुगिन् प्रीति

काठमाडौं। व्यवसायिक लिग खेल्न नेपाली राष्ट्रिय टोलीकी मिडफिल्डर प्रीति राईले जोर्डन पुगेकी छन्।

विभागीय टोली एपिएफ क्लबका मुख्य प्रशिक्षक जीवेशकुमार पाण्डेका अनुसार उनी सम्पूर्ण प्रकृया पूरा गरेर जोर्डन पुगेकी हुन्। उनले खेलपाटीसँग पुष्टी गर्दै भने,‘हो, उनी जोर्डन पुगिसकिन।’ यद्यपि, क्लबले भने उनलाई अझै सार्वजनिक गरेको छैन।

उनलाई एएफसी च्याम्पियनसिप लिग २०२५/०२६ को प्रारम्भिक चरणका लागि अल इत्तिहाद क्लबले अनुबन्ध गरेको हो। उनी यसअघि एपिएफ क्लबबाट घरेलु प्रतियोगिता खेल्दै आएकी थिइन्। उनको यो दोस्रो विदेशी क्लब हो।

यसअघि उनले यसअघि किक स्टार्स फुटबल क्लबबाट इन्डियन वुमेन्स लिगसमेत खेलेकी थिइन्। इत्तिहात क्लब जोर्डनको अम्मानमा अवस्थित छ। यो क्लबले जोर्डम महिला प्रो लिग खेल्दै आएको छ। 

यो ७ वर्षअघि (सन् २०१८ मा) मात्रै स्थापना भएको क्लब हो। क्लबमा पाकिस्तानी फरवार्ड नाइमा बोहानी पनि अनुबन्धित छन्। क्लबले सन् २०२३ र २०२४ मा लगातार लिग जितेको थियो। यो क्लबले गत वर्षपछि एएफसी महिला च्याम्पियनसिप लिगको प्रारम्भिक चरणका खेल खेलेको थियो। 

समूह ‘बी’ मा भारतको ओडिशा फुटबल क्बल र सिंगापुरको लायन सिटी रहेको समूहमा इत्तिहादले एक खेल मात्रै जितेको थियो।

समूह चरणको पहिलो खेलमा इत्तिहादले लायनलाई ५–० ले पराजित गरेको थियो। तर, दोस्रो खेलमा ओडिशासँग २–१ ले पराजित भयो।

यसपटक यो क्लब समूह ‘सी’ छ। यो समूहमा मलेसियाको केलाना युनाइटेड, सिंगापुरको लायन सिटी र किर्गिजस्तानको सड्युशोर एसआई एसियागोल रहेका छन्।

यो समूहको खेल मलेसियामा हुनेछ। इत्तिहादले पहिलो खेल अगस्ट २५ मा लायनसँग खेल्नेछ।