इतिहास लेख्न आतुर रोनाल्डो

काठमाडौं। भेट्रान फरवार्ड क्रिस्टियानो रोनाल्डोले साउदी प्रो–लिग क्लब अल–नासरसँग दुई वर्षको नयाँ सम्झौतामा हस्ताक्षर गर्दै क्लबमा आफ्नो यात्रा थप लम्ब्याएका छन्।

‘नयाँ अध्याय सुरु भयो,’ रोनाल्डोले सामाजिक सञ्जालमा लेखे,  ‘उही जोश, उही सपना। आउनुहोस्, फेरि इतिहास रचौं।’

सन् २०२२ मा म्यानचेस्टर युनाइटेड छाडेपछि रोनाल्डो फ्री एजेन्डका रूपमा अल–नासर पुगेका थिए। उनले अहिलेसम्म क्लबका लागि सबै प्रतियोगितामा १०५ खेलमा ९३ गोल गरेका छन्।

कतारमा भएको २०२२ को विश्वकपपछि उनले साढे वर्षे सम्झौतासहित क्लबमा आवद्ध हुँदै विश्वकै सबैभन्दा बढी तलब पाउने खेलाडी बनेका थिए। फोर्ब्सका अनुसार पछिल्ला तीन वर्षदेखि उनी विश्वकै सर्वाधिक आम्दानी गर्ने खेलाडी सूचीको शीर्षमा छन्।

४० वर्षको उमेरमा रोनाल्डोको कुल आम्दानी लगभग २७५ मिलियन डलर भएको अनुमान गरिएको छ। उनी अझै पनि दमदार प्रदर्शन गरिरहेका छन्। हालै मात्र उनले स्पेनलाई हराउँदै पोर्चुगललाई दोस्रो पटक युइएफा नेसन्स लिगको उपाधि जिताउन सहयोग गरेका थिए।

उनी आफ्नो करियरको १००० गोलको कोशेढुंगामा पनि ध्यानमा राख्दै अगाडि बढिरहेका छन्। अहिलेसम्म क्लबस्तरमा ७९४ र पोर्चुगलका लागि १३८ गोल गर्दै उनले कुल ९३२ गोल पूरा गरिसकेका छन्।

साउदी अरब पुगेपछि रोनाल्डोको प्रभाव यति गहिरो भयो कि युरोपका थुप्रै चर्चित खेलाडी साउदी लिगतर्फ आकर्षित भए। रियल मड्रिडका उनका पूर्वसहकर्मी करिम बेन्जेमा पनि साउदी लिग आएका छन्।

यद्यपि, उनले अल–नासर अरब क्लब च्याम्पियन्स कप जिताएका छन्। साउदी प्रो–लिग जिताउन चाहिँ सकेका छैनन्। २०२२–२३ र २०२३–२४ मा क्बल उपविजेतामा सीमित रह्यो भने गत सिजन तेस्रो स्थानबाट माथि उक्लिन सकेन।

मे महिनामा क्लबका स्पोर्टिङ डाइरेक्टर फर्नान्डो हियेरोले रोनाल्डोलाई नयाँ सम्झौता गराउन इच्छुक रहेको बताएका थिए। त्यतिबेला रोनाल्डोले सिजनको अन्तिम खेल नै अल–नासरका लागि अन्तिम हुनसक्ने संकेत दिएका थिए।

तर, अहिले नयाँ सम्झौतासँगै पाँच पटकका बलन डि’ओर विजेता रोनाल्डोले आफू सातौं नयाँ क्लबमा जाने हल्लालाई पूर्णविराम दिएका छन्। उनी अझै पनि अल–नासरमै इतिहास रच्ने लक्ष्यसहित मैदानमा उत्रनेछन्।