सुआरेज र मेसीले क्लब चलाउने

काठमाडौं। वर्षौंसम्म मैदानमा सहयात्री बनेका लुइस सुआरेज र लिओनल मेसी अब व्यवसायिक साझेदारीमा पनि एकसाथ अघि बढ्ने भएका छन्।

सुआरेजले मंगलबार आफ्नो जन्मदेश उरुग्वेमा नयाँ व्यावसायिक फुटबल क्लब सुरु गरेको जानकारी दिएका छन्। उक्त क्लबमा इन्टर मियामीका उनका साथी मेसीको पनि लगानी हुनेछन्।

उरुग्वे राष्ट्रिय टोलीका इतिहासकै सबैभन्दा बढी गोल गर्ने सुआरेजले सामाजिक सञ्जालमार्फत भिडियो सेयर गर्दै जानकारी दिएका डिपोर्टिभो एलस नामक क्लबलाई अब एलएसएम भनेर चिनिने बताए। उनका अनुसार क्लबले उरुग्वेको चौथो डिभिजनबाट व्यावसायिक फुटबल यात्रा सुरु गर्नेछ।

‘डिपोर्टिभो एलस एउटा पारिवारिक सपना हो, जुन सन् २०१८ मा सुरु भएको थियो। अहिले यस क्लबमा तीन हजारभन्दा बढी सदस्य छन्,’ सुआरेजले भने,‘म मेरो देश उरुग्वेका किशोर र बालबालिकालाई फुटबलको माध्यमबाट अवसर दिन चाहन्छु।’

३८ वर्षीय सुआरेजले गत सेप्टेम्बरमा अन्तर्राष्ट्रिय फुटबलबाट सन्न्यास लिएका थिए। उनले बार्सिलोनामा मेसीसँग ६ वर्ष सँगै खेलेका थिए। पछिल्ला दुई सिजनदेखि अमेरिकास्थित इन्टर मियामी क्लबमा यी दुई खेलाडी एकसाथ खेलिरहेका छन्।

उक्त भिडियोमा मेसीले भनेका छन्,‘तिमीले मलाई रोजेकोमा म गर्व गर्छु र खुसी पनि। म जे–जति सक्दो योगदान दिन्छु। हामी सँगै अगाडि बढ्दै छौं।’

हाललाई मेसीको भूमिका खुलाइएको छैन। तर, स्थानीय सञ्चारमाध्यमले उनी क्लबका साझेदार रहने बताएका छन्। उरुग्वे र इन्टर मिलानका पूर्व स्टार अल्भारो रेकोबा क्लबको प्रशिक्षक हुने बताइएको छ।

सन् २०१८ मै सुआरेज र उनको परिवारले उरुग्वेको राजधानी मोन्टेभिडियोबाहिर सियुदाद दे ला कोस्टामा २० एकड क्षेत्रफलमा खेलकुद कम्प्लेक्स स्थापना गरेका थिए। सो कम्प्लेक्समा तीन हजारभन्दा बढी खेलाडीका लागि विविध खेल र गतिविधिहरू गरिन्छन्।

क्लबसँग १४ सय दर्शक अट्ने क्षमताको कृत्रिम मैदानसहित अन्य प्रशिक्षण मैदान पनि छन्। यही आधारमा सुआरेज र मेसीले उरुग्वेमा नयाँ फुटबल यात्रा सुरु गर्न लागेका हुन्।