भगवती क्लबलाई एक करोड रुपैयाँ र भूतखेल मैदान दिने घोषणा

काठमाडौं। टोखा नगरपालिकाले शीर्ष डिभिजन (ए डिभिजन) मा उक्लिएको श्री टोखा भगवती क्लबलाई एक करोड रुपैयाँ आर्थिक सहयोग र अभ्यासका लागि भूतखेल मैदान उपलब्ध गराउने घोषणा गरेको छ ।

गत साता सम्पन्न सहिद स्मारक ‘बी’ डिभिजन लिगमा उपविजेता बनेर भगवती बढुवा भएको थियो। 

सोमबार नगरपालिकाले आयोजना गरेको विशेष सम्मान समारोहमा क्लबका खेलाडी, प्रशिक्षक र पदाधिकारीहरूलाई सम्मान गर्दै नगर प्रमुख प्रकाश अधिकारीले आर्थिक सहयोगको घोषणा गरे । 

मेयर अधिकारीले क्लबको सफलताले टोखा नगरलाई राष्ट्रिय तथा अन्तर्राष्ट्रिय स्तरमा चिनाउन मद्दत गरेको उल्लेख गर्दै आगामी दिनमा क्लबलाई आवश्यक पर्ने सबै किसिमको सहयोग गर्ने प्रतिबद्धता व्यक्त गरे ।

कार्यक्रममा उपप्रमुख मुरारी तामांगले क्लबलाई भूतखेल खुला मञ्च प्रयोग गर्न दिने तथा एकेडेमी सञ्चालनको व्यवस्था मिलाउने घोषणा गरे ।

१३ खेलमा ७ जित, ५ बराबरी र १ हारसहित २६ अंक बटुल्दै उपविजेता बन्दै शिर्ष डिभिजन पुगेको भगवती क्लबले आगामी सिजन ए डिभिजन लिग खेल्नेछ । 

नगरपालिकाले क्लबका खेलाडी तथा अफिसियलहरूलाई मायाको चिनो र खेल पोसाक वितरण गर्दै थप सफलताको शुभकामना व्यक्त गरेको थियो ।