अस्थायी डिफेन्स लाइनमा भर पर्दै रियल

काठमाडौं। स्पेनिस ला लिगा शीर्ष स्थानमा रहिरहन रियल मड्रिड यो साता पनि आफ्नो अस्थायी डिफेन्स लाइनमै भर पर्नेछ।

रियलले शनिबार ओसासुनासँग प्रतिस्पर्धा गर्दैछ। टोली एट्लेटिको मड्रिडभन्दा एक अंक र बार्सिलोनाभन्दा दुई अंकले मात्र अघि छ।

प्रशिक्षक कार्लो एन्सेलोटीले मंगलबार पहिलोपटक नयाँ डिफेन्स लाइन प्रयोग गरेका थिए। च्याम्पियन लिगअन्तर्गत भएको उक्त खेलमा रियलले म्यानचेस्टर सिटीलाई ३–२ ले पराजित गरेको थियो।

शनिबार पनि फर्लान्ड मेन्डी, ओरिलियन चुआमेनी, राउल एसेन्सियो र फेडेरिको भाल्भेर्डे नै रक्षामा हुने सम्भावना छ। रियलका प्रमुख डिफेन्डरहरू एडर मिलिताओ, एन्टोनियो रुडिगर, डेभिड अलाबा, डानी कार्भाजाल र लुकास भास्क्वेज चोटका कारण अनुपस्थित छन्।

‘यद्यपि, नयाँ डिफेन्स लाइनको प्रदर्शनबाट एन्सेलोटी खुसी देखिए। यी चार डिफेन्डरले प्रशिक्षणमा समेत सँगै खेलेका थिएनन्। तर, उनीहरूको प्रदर्शन अविश्वसनीय रह्यो,’ उनले भने।

उनले थपे, ‘चुआमेनीले आलोचना खेप्दै आएका थिए, तर उत्कृष्ट खेले। एसेन्सियो अझै परिपक्व देखिए, भाल्भेर्डे र मेन्डी पनि प्रभावशाली रहे। हामीले संकटको परिस्थितिबाट राम्रो नतिजा निकाल्न सफल भयौं।’

अन्य खेलाडीहरू पनि टिमको डिफेन्स सन्तुलनमा ध्यान दिइरहेका छन्। ‘डिफेन्स गर्नु सम्पूर्ण टिमको जिम्मेवारी हो। सिटीविरुद्ध हामीले राम्रो समन्वय देखायौं,’ उनले भने।

यसबाहेक उनले दोस्रो लेगका लागि रुडिगर र अलाबा उपलब्ध हुने आशा राखेका छन्। ला लिगामा पछिल्लो खेलमा रियलले एट्लेटिकोसँग १–१ को बराबरी खेलेको थियो, जसको फाइदा उठाउँदै बार्सिलोनाले अंक दूरी घटाएको छ।

बार्सिलोनाले यो वर्ष नौ जित र दुई बराबरी खेल्दै अपराजित यात्रा तय गरिरहेको छ। सोमबार बार्सिलोनाले रायो भालेकानोलाई घरेलु मैदानमा स्वागत गर्दैछन्।

एट्लेटिकोले डिसेम्बरमा बार्सिलोनालाई अन्तिम पटक हराएको थियो। शनिबार एट्लेटिकोले सेल्टा भिगोसँग घरेलु मैदानमा खेल्दैछन्। डिएगो सिमिओनेको टोलीले पछिल्ला २२ मध्ये एक खेलमा मात्र पराजय भोगेको छ।