काठमाडौं। ओस्माने डेम्बेलेको उत्कृष्ट प्रदर्शनसहित पेरिस सेन्ट–जर्मेन (पिएसजी) ले मंगलबार ब्रेस्टविरुद्धको च्याम्पियन्स लिग प्लेअफको पहिलो लेगमा ३–० को सानदार जित दर्ता गर्यो।
च्याम्पियन्स लिगको इतिहासमा दोस्रो पटक दुई फ्रेन्च टोलीहरू आमनेसामने भएका थिए। खेलमा ब्रेस्टले पनि केही अवसर सिर्जना गरे तापनि पीएसजीले आफ्नो उत्कृष्ट प्रदर्शन कायम राख्दै खेललाई एकतर्फी बनायो।
योसँगै पिएसजीले आफ्नो अपराजित यात्रा १० खेलमा पुर्याएको छ। उत्कृष्ट फर्ममा रहेका डेम्बेलेले यो अवधिमा १८ गोल गरिसकेका छन्।
खेलको २१औं मिनेटमा पिएर लिज–मेलोको ह्यान्डबलपछि पिएसजीले पेनाल्टी प्राप्त गरेको थियो। जसलाई भिटिन्हाले सहजै गोलमा परिणत गर्दै टोलीलाई अग्रता दिलाए।
ब्रेस्ट खेलमा फर्किने अवसरनजिकै पुगेको थियो। तर, ३०औं मिनेटमा अब्दल्लाह सिमाको हेडर पोस्टमा लागेर बाहिरिइयो। पिएसजीले पहिलो हाफको अन्त्यतिर आफ्नो अग्रता दोब्बर बनायो। डेम्बेलेले दायाँ विंगबाट कट गर्दै सिधै बल जाली चुमाए।
दोस्रो हाफको सुरुआतमै पिएसजीका डेजायर डोइले गोल गरेका थिए। तर, एक मिनेट लामो भिएआरजाँचपछि अफसाइड घोषित गर्दै गोल रद्द गरियो। ६६औं मिनेटमा लुज बलमा मौका बनाउँदै डेम्बेले नै पेनाल्टी क्षेत्रबाट गोल गरे। यो सिजन उनको २३औं गोल हो।
प्रतियोगिताको नयाँ स्वरूपअनुसारको लिग चरण पार गर्न पिएसजीले संघर्ष गरेको थियो। तर, अब दोस्रो लेगमा पेरिसमा ठूलो अप्रत्याशित नतिजा नआएसम्म पिएसजीलाई अर्को चरणमा पुग्न कुनै समस्या नहुने देखिन्छ।
