काठमाडौं। रियल मड्रिडका स्टारहरू कहिल्यै हार मान्दैनन्। तर, म्यानचेस्टर सिटीले भने बारम्बार उही गल्ती दोहोर्याइरहेको हुन्छ।
च्याम्पियन्स लिगको प्लेअफको पहिलो लेगअन्तर्गत इतिहाद स्टेडियममा मंगलबार राति सम्पन्न खेलमा ८०औं मिनेटसम्म सिटी २–१ ले अगाडि थियो।
एर्लिङ हालान्डले दुवै हाफमा गोल गर्दै घरेलु टोलीलाई अग्रता दिलाएका थिए। तर, जुड बेलिङ्घमले अतिरिक्त समयमा निर्णायक गोल गर्दै रियललाई अविश्वसनीय पुनरागमनमार्फत ३–२ को जित दिलाए।
सिटीले सुरुआती अग्रता लिए पनि अन्तिमतिर पुगेर गोल खाएको यो पहिलो खेल होइन। च्याम्पियन्स लिगमा यो सिजन मात्र सिटीले खेलको अन्तिम १५ मिनेटमा सात गोल खाएको छ, जुन चिन्ताजनक तथ्यांक हो।
‘हामीले खेललाई राम्रोसँग सम्हाल्न आवश्यक छ,’ सिटीका डिफेन्डर जोन स्टोन्सले भने, ‘यो नतिजा अहिले सकारात्मक देखिँदैन। तर, हामीले मनोबल उच्च राख्नुपर्छ।’
बेलिङ्घमले थपिएको समयमा भिनिसियस जुनियरको पासमा गोल गर्दै सन् २०२२ को सेमिफाइनलको सम्झना दिलाए। त्यतिबेला रोड्रिगोले खेलको अन्तिमतिर दुई गोल गर्दै सिटीलाई अतिरिक्त समयमा हराएका थिए।
हालान्डले १९औं मिनेटमा सिटीलाई सुरुआती अग्रता दिलाएका थिए। त्यसअघि रियलले पेनाल्टी अपिल गरेको थियो। तर, रेफ्रीले अफसाइडको कारण देखाउँदै पेनाल्टी दिन अस्वीकार गरे। फेर्लान्ड मेन्डीको प्रयास म्यानुएल अकान्जीले ‘ब्लक’ गरेका थिए।
भिनिसियसले पोस्ट बारमा लाग्ने गरी सट हाने। अकान्जीको हेडर पनि पोस्टमा लागेको थियो। दोस्रो हाफ सुरु भएको एक मिनेटमै हालान्डको अर्को प्रहार बारमा लाग्यो।
केलियन एम्बाप्पेले ६०औं मिनेटमा भाग्यशाली गोल गर्दै खेल बराबरीमा ल्याए। उनको ‘मिसकिक’ प्रहार सिटीका गोलकिपर एडर्सनलाई बिट हुँदै गोललाइन पार गर्यो।
एम्बाप्पेको अर्को प्रहार पोस्टमा ठोकियो। त्यसपछि सिटीलाई पेनाल्टी मिल्यो, जुन हालान्डले गोल गर्दै पुनः २–१ को अग्रता दिलाए। तर, सिटीकै पूर्वखेलाडी ब्राहिम डियाजले खेल बराबरी बनाए। बराबरीतिर उन्मुख खेलमा अन्तत: बेलिङ्घमले निर्णायक गोल गर्दै रियललाई जित दिलाए।
‘सिटी जुनसुकै अवस्थामा भए पनि अविश्वसनीय टोली हो,’ बेलिङहमले भने, ‘सिटीको खेलशैली अत्यन्त कठिन छ। तर, हामीले अन्ततः अवसरको सही उपयोग गर्यौं।’
अन्य खेलमा पेरिस सेन्ट–जर्मेन (पिएसजी) ले ब्रेस्टलाई ३–० ले हराउँदै अर्को चरणमा जाने सम्भावना बलियो बनाएको छ। युभेन्ट्सले पिएसभी इन्दोभेनलाई २–१ ले पराजित गर्यो भने बोरुसिया डर्टमुन्डले स्पोर्टिङ लिस्बोनलाई ३–० ले हराउँदै खेल आफ्नो पक्षमा राख्न सफल भयो।
