३९ वर्षीय रामोसलाई उपाधि ‘भोग’

काठमाडौं। स्पेनिस डिफेन्डर सर्जियो रामोसले थप उपाधि जित्ने र फिफा क्लब विश्वकपको आगामी संस्करणमा खेल्ने अवसरले आफू फुटबलमा फर्किएको बताएका छन्।

३९ वर्षका रामोसले मेक्सिकोको लिगा एमएक्सको मोन्टेरे क्लबसँग एक वर्षको सम्झौता गरेका छन्। उनलाई क्लबले आइतबार सार्वजनिक रूपमा परिचय गराएको थियो।

‘म यात्रा गर्न होइन, नयाँ उपाधि जित्न यहाँ आएको हुँ,’ उनले भने। मोन्टेरेलाई सामान्यतया र्‍योडोस भनेर चिनिन्छ। यो मेक्सिकोको सबैभन्दा आर्थिक रूपमा बलियो क्लबहरूमध्ये एक हो।

यो क्लब अर्को वर्ष अमेरिकामा हुने फिफा क्लब विश्वकपको विस्तारित संस्करणमा सहभागी हुने तीनवटा मेक्सिकन टोलीमध्ये एक हो। अन्य दुई क्लबहरू लियोन र पाचुका हुन्। घरेलु लिगसँगै मोन्टेरे कन्काकाफ च्याम्पियन्स कपमा पनि प्रतिस्पर्धा गर्दैछ।

‘यो क्लबमा ठूलो सम्भावना छ। क्लबले स्थानीय र अन्तर्राष्ट्रिय दुवै प्रतियोगिता खेल्छ। आफ्नो पहिचान बनाउनको लागि यो सही ठाउँ हो,’ उनले थपे, ‘यो निर्णय लिन मलाई सजिलो भयो।’

सन् २०१० मा स्पेनको विश्वकप विजेता टोलीका सदस्य रामोसले गत वर्ष मे महिनामा सेभियाको लागि स्पेनिस लिगमा अन्तिम आधिकारिक खेल खेलेका थिए। तर, उनले नयाँ चुनौतीप्रति कुनै चिन्ता नरहेको बताए।

‘फुटबलमा उमेरले होइन, प्रदर्शन महत्त्व राख्छ। लामो फुटबल करियरपछि यहाँ आउनुले अझै जित्ने भोक मसँग रहेको प्रमाणित गर्छ,’ उनले भने। रामोसले स्पेनसँग सन् २०१२ को युरोकप, रियल मड्रिडबाट पाँच पटक स्पेनिस लिग र चार पटक च्याम्पियन्स लिग उपाधि जितेका थिए।

‘म जित्न कहिल्यै थाक्दिनँ। तर, म यहाँ मेरा पुराना उपलब्धिहरूको कुरा गर्न आएको होइन, मेक्सिकोमा आफ्नो विरासत छोड्न आएको हुँ,’ उनले भने।