एपीएफ र प्रदेश नम्बर १ क्वाटरफाइनलमा

पोखरा । विभागीय टिम सशत्र प्रहरीको एपीएफ क्लब र प्रदेश नम्बर १ पोखरामा जारी दोस्रो संस्करणको सभामुख राष्ट्रिय महिला भलिबल प्रतियोगिताको क्वाटरफाइनलमा प्रवेश गरेका छन् ।

पोखरा रंगशालामा बुधबार भएको खेलमा एपीएफले सुदूरपश्चिम प्रदेशलाई ३ - ० को सेटमा हराएर लगातार दुई जितसहित क्वाटरफाइनलमा स्थान बनाएको हो । एपीएफले सुदूरपश्चिममाथि २५-४, २५-७ र २५-३ को सेटमा पराजित गर्यो ।

जितसंगै एपीएफले समूह 'ए' बाट विजेता बन्दै क्वाटरफाइनलमा स्थान बनएको हो । यस समूहबाट प्रदेश नम्बर १ उपविजेता बन्दै क्वाटरफाइनलमा पुग्न सफल भयो । प्रदेश नम्बर १ ले बुधबार सुदूरपश्चिमलाई नै ३-२ को सेटमा हराएको थियो  । प्रदेश १ ले सुदूरपश्चिमलाई २५-१३, १५-२५,१७-२५,२५-२२ र १५-११ को सेटमा हरायो ।

यस्तै समूह 'बी' बाट प्रदेश नम्बर ५ र २ ले क्वाटरफाइनलमा स्थान बनाएको छ । बुधबार भएको खेलमा दुवै प्रदेशले कर्णाली प्रदेशलाई हराएको थियो ।

प्रदेश नम्बर ५ ले कर्णालीलाई २५-१५, २५-११ र २५-१० को सेटमा हरायो ।  यस्तै प्रदेश २ ले कर्णालीलाई २५-२३,२५-१०,२५-१० र २५-१६ को सेटमा पराजित गर्यो ।

योसंगै प्रतियोगिताको क्वाटरफाइनलमा पुग्ने टोलीको तय भएको छ । क्वाटरफाइनल खेलहरु बिहिबारबाट सुरु हुनेछ ।

पश्चिमाञ्चल क्षेत्रीय खेलकुद विकास समितिको आयोजना तथा नेपाल भलिबल संघको प्राविधिक सहयोगमा जारी प्रतियोगिताको विजेताले नगद ३ लाख ५० हजार रुपैयाँ पाउने छन् । यस्तै दोस्रो हुने टिमले १ लाख ७५ हजार, तेस्रोले १ लाख रुपैयाँ र चौथोले सान्त्वना स्वरुप २५ हजार रुपैयाँ पाउने छन् ।

प्रतियोगिताको उत्कृष्ट खेलाडीले १० हजार प्राप्त गर्दा व्यक्तिगत विधातर्फ उत्कृष्ट हुने स्पाईकर, सेटर, लिबरो, ब्लकर, सर्भर र प्रशिक्षकले समान ५/५ हजार पाउनेछन् ।