पुलिस र प्रदेश नम्बर ३ क्वाटरफाइनलमा

पोखरा । विभागीय टिम नेपाल पुलिस क्लब र प्रदेश नम्बर ३ पोखरामा जारी दोस्रो संस्करणको सभामुख राष्ट्रिय महिला भलिबल प्रतियोगिताको क्वाटरफाइनलमा प्रवेश गरेका छन् ।

पोखरा रंगशालामा मंगलबार भएको खेलमा पुलिसले गण्डकी प्रदेशलाई ३ - ० को सेटमा हराएर क्वाटरफाइनलमा स्थान बनाएको हो । पुलिसले २५-१९, २५-२० र २५-१७ को सेटमा पराजित गर्यो ।

जितसंगै पुलिस समूह 'डी' को समूह विजेता बन्दै क्वाटरफाइनलमा पुगेको हो । पराजित भएपनि गण्डकी उपविजेता बन्दै क्वाटरफाइनलमा स्थान बनाउन सफल भएको छ । यस समूहमा दुई टोली मात्र रहेको कारण दुवै टोलीले क्वाटरफाइनलमा स्थान पक्का गरेको हो ।

यस्तै प्रदेश नम्बर ३ ले विभागीय टिम त्रिभुवन आर्मी क्लबलाई ३-१ को सेटमा हराएर क्वाटरफाइनलमा स्थान पक्क गर्यो । प्रदेश नम्बर ३ ले आर्मीमाथि २५-१०,१२-२५,२५-२० र २५-१४ को सेटमा हरायो ।

जितसंगै प्रदेश नम्बर ३ ले समूह 'सी' को विजेता बन्दै क्वाटरफाइनलमा स्थान पक्का गरेको हो । पराजित भएपनि आर्मीले उपविजेता बन्दै क्वाटरफाइनलमा स्थान पक्का गरेको छ । यस समूहमा पनि दुई टोली मात्र रहेको कारण दुवै टोलीले क्वाटरफाइनलमा स्थान पक्का गरेको हो ।

प्रतियोगिता अन्तर्गत एपीएफले प्रदेश नम्बर १ लाई हराएर विजयी सुरुवात गरेको छ । एपीएफले प्रदेश नम्बर १ लाई २५-३,२५-८ र २५-३ को सेटमा हराएको हो । जितसंगै समूह 'ए' बाट एपीएफले क्वाटरफाइनलमा पुग्ने संभवाना बलियो बनाएको छ ।

यस्तै समूह 'बी' अन्तर्गत प्रदेश नम्बर ५ ले प्रदेश नम्बर २ लाई २५-१०,२५-८ र २५-१४ को सेटमा पराजित गरेको छ ।

पश्चिमाञ्चल क्षेत्रीय खेलकुद विकास समितिको आयोजना तथा नेपाल भलिबल संघको प्राविधिक सहयोगमा जारी प्रतियोगिताको विजेताले नगद ३ लाख ५० हजार रुपैयाँ पाउने छन् । यस्तै दोस्रो हुने टिमले १ लाख ७५ हजार, तेस्रोले १ लाख रुपैयाँ र चौथोले सान्त्वना स्वरुप २५ हजार रुपैयाँ पाउने छन् ।

प्रतियोगिताको उत्कृष्ट खेलाडीले १० हजार प्राप्त गर्दा व्यक्तिगत विधातर्फ उत्कृष्ट हुने स्पाईकर, सेटर, लिबरो, ब्लकर, सर्भर र प्रशिक्षकले समान ५/५ हजार पाउनेछन् ।