‘भलिबल प्रतियोगिता व्यवस्थापनमा समेत सफल’

काठमाडौं । पुरानो नैकापमा दोस्रो संस्करणको न्यू डाइमन्ड कप खुला राष्ट्रिय महिला भलिवल प्रतियोगिता सम्पन्न भयो । पुस २५ गतेबाट सुरु भएको प्रतियोगिताले शनिबार (आज) बिट मार्यो । विद्यालयस्तरीय टोली न्यू डायमण्डले आफ्नै एकेडेमीको सानो भलिबल कोर्टमा प्रतियोगिता आयोजना गर्नुपर्ने चुनौती यथावत छ । विद्यालय चलाउँदै आएका भलिबल प्रशिक्षक कुमार राई प्रतियोगिताका मुख्य व्यवस्थापक समेत हुन् ।

उनी एकप्रकारले न्यु डायमण्डका ‘परिकल्पनाकार’ हुन् । स्कुल मात्र होईन, महिला भलिबलको एकेडेमी चलाउने उनको सपना हो । विद्यालयस्तरीय टिम न्यु डायमण्डले नेपालको महिला भलिबलमा राम्रा खेलाडी दिएको छ । रमिला तण्डुकारदेखि नयाँमा प्रतिभा माली त्यसैका उदाहरण हुन् । उनी न्यु डायमण्डका प्रिन्सिपल मात्र होईनन्, न्यु डायमण्ड टिमका सदाबहार प्रशिक्षक समेत हुन् ।

कारण, उनैले विगत १०–१२ बर्षबाट महिला टिमलाई प्रशिक्षण दिईरहेका छन् । उनी किताबमात्र पढाउदैनन्, भलिबलका कखरा समेत सिकाउछन् । उनैले भरेको शिल्पले धेरै महिला खेलाडीले घरेलु भलिबलमा आफुलाई स्थापित गराएका छन् ।

स्कुल र भलिबल चलाउँदै आएका प्रशिक्षक राईले पछिल्लो समय भलिबल प्रतियोगिता आयोजनाको जिम्मेवारी लिएका छन् । त्यसैको श्रृङ्खला हो, दोस्रो संस्करणको न्यु डायमण्ड कप महिला भलिबल ।

आयोजक हुनुको दुखै बेग्लै । अरु प्रतियोगिता खेल्न गए आफ्नो टिम मात्र हेरे पुग्ने थियो । आयोजक भएपछि सबैतर्फ नजर घुमाउनुपर्ने भयो । फाईनल खेलमा उनको टोली विभागीय टिम एपीएफसंग पराजित भयो । तर प्रशिक्षक कुमार राई मुस्कानका साथ प्रस्तुत भए, ‘अन्य ठाउँको भन्दा राम्रो खेलायौ । प्रतियोगिता सफलताका साथ सञ्चालन गर्न पाउदाँ खुसी छु ।’

प्रतियोगिताको व्यवस्थापन र प्रशिक्षण दुवै जिम्मेवारी एकै पटक निभाउन गाह्रो भएको उनको कथन थियो । ‘ब्यवस्थापनमा लाग्नु कि कोचिङ ? निकै गाह्रो बिषय रहेछ ।’ उनले थपे, ‘हामीसंग दर्शकको लागि सानो ठाउँ भयो । दर्शक अटाउन नि गाह्रो भयो ।’

स्कुलको सानो प्राङ्गणमा राष्ट्रिय प्रतियोगिता गर्दै आएका राई गर्वका साथ भन्छन्, ‘ढोरपाटन भन्दा उपयुक्त तरिकाले धुरो रहित प्रतियोगिता आयोजना गर्न सफल भयौ ।’

खेल हेर्न आएको भिड देखेर उनको मनमा एउटै खिन्नता छ, ‘हामीसँग खेल खेलाउन एउटा ठुुलो मैदान भएन ।’

दोस्रो संस्करणको प्रतियोगिता आयोजना गरिसकेपछि उनी फुरुङ्ग छन् ।

‘अब मान्छेहरुमा कुमार सरका इष्ट मित्र रैछन् । उहाँले चाहनु भयो भने सक्नुहुन्छ भन्ने मान्छेमा छाप परेको छ ।’ उनले थपे ।
फाइनलमा आयोजक न्यु डायमण्डलाई पराजित गर्दै विभागीय टिम एपिएफले उपाधि हात पर्याे, तर प्रशिक्षक कुमार आफ्ना खेलाडीको प्रर्दशनबाट सन्तुष्ट देखिएनन् ।

‘टिमको प्रदर्शन पटक्कै चित्त बुझेन । जति खेलाडीबाट आश गरेको थिए, त्यो हुन सकेन ।’ खेलपछि उनले भने । चार दिनसम्म चलेको प्रतियोगितामा ८ टिम सहभागि थिए । उपत्यका बाहिरका टिमलाई यातायातसंगै बसोबासको व्यवस्था आयोजकले उपलब्ध गराएको थियो ।