आयरल्यान्डसँग खेल्ने नेपाल ‘ए’ टोलीको घोषणा

काठमाडौँ। नेपाल क्रिकेट संघ (क्यान)ले आयरल्यान्ड ‘ए’ सँग खेल्ने नेपाल ‘ए’ टोलीको घोषणा गरेको छ।

कीर्तिपुरस्थित त्रिवि क्रिकेट मैदानमा हुने टी २० र एक दिवसीय शृंखलाका लागि क्यानले आइतबार विनोद भण्डारीको कप्तानीमा दुई फरक टोलीको घोषणा गरेको हो।

शृंखलाअन्तर्गत सिनियर टोलीले आयरल्यान्ड ‘ए’ सँग चैत १२ र १३ गते टी२० खेल खेल्ने छ। त्यसपछि यो टोली भारतमा गएर खेल्ने छ।

भारतमा सिनियर टोलीले बरोडा र गुजरातसँग चार टी२० खेल खेल्ने छ। सिनियर टोलीले भारतमा खेलिरहँदा नेपाल ‘ए’ ले आयरल्यान्डसँग १५, १६ र १८ गते तीन खेलको टी२० खेल खेल्ने छ। 

त्यसपछि एक दिवसी शृंखला हुने छ। पहिलो खेल चैत २१ मा हुने छ। दोस्रो खेल चैत २३ र अन्तिम खेल २५ गते हुने छ। 

टी२० टोलीमा विनोदसँगै लोकेश बम, देव खनाल, पवन सर्राफ, किरण ठगुन्ना, आरिफ शेख, अर्जुन घर्ती, नारायण जोशी, बसिर अहमद, राशिद खान रहेका छन्।

यस्तै, सागर ढकाल, विपिन खत्री, कमलसिंह ऐरी, हेमन्त धमी र विकाश आग्री पनि टी२० टोलीमा हुने छन्।

एक दिवसीय टोलीमा विनोद, देव, आरिफ, बसिर, कमल र विकाश दोहोरिने छन्। उनीहरूबाहेक अर्जुन कुमाल, नरेन भट्ट, भीम सार्की, साहब आलम, रञ्जित कुमार, रुपेश सिंह, रिजन ढकाल र मौसम ढकाल श्याम रहने छन्।