‘फ्लड लाइट’ जडानको बोलपत्र रद्द

काठमाडौँ। राष्ट्रिय खेलकुद परिषद् (राखेप)ले त्रिवि अन्तर्राष्ट्रिय क्रिकेट मैदानमा ‘फ्लड लाइट’ जडान गर्न आह्वान गरेको बोलपत्र रद्द गरेको छ।

राखेपले साउन १७ गते ‘फ्लड लाइट’ जडानका लागि बोलपत्र आह्वान गरेको थियो। तर, निर्माण कम्पनी छनोटका क्रममा देखिएको विवादका कारण उक्त बोलपत्र रद्द गरिएको हो। 

‘राष्ट्रिय खेलकुद परिषदद्वारा कीर्तिपुरस्थित क्रिकेट खेल मैदानमा आईसीबी/ ईपीसी/ एफएलडी डट एआईटी/२१.२३३/८०/८१| टीयूमा फ्लड लाइटको आपूर्ति र स्थापना क्रिकेट मैदानसम्बन्धी बोलपत्र मिति २०८० / १७ मा मागमा बोलपत्र मिति २०८० १२/०८ निर्णय अनुसार बोलपत्र रद्द गरिएको हुँदा सम्बन्धित सबैका लागि यो सूचना जारी गरिएको छ,’ राखेपको सूचनामा भनिएको छ।

स्मरण रहोस् ‘फ्लड लाइट’ हाल्ने ठेक्का एमएसआईपीएल–एएससी पावर जेभीले पाएको थियो। एमएसआईपीएलले उक्त ठेक्का २७ करोड ४ लाख २ हजार २२ रुपैयाँमा पाएको थियो। 

पहिलो पटक खोलेको बोलपत्रमा कुनै पनि कम्पनीले चासो नदेखाएपछि राखेपले दोस्रो पटक बोलपत्र आह्वान गर्दै गत मंसिरमा एमएसआईपीएललाई छनोट गरेको थियो।

सार्वजनिक खरिद ऐन २०६३ दफा २७ (२) अनुसार एमएसआईपीएललाई ‘फ्लड लाइट’ जडानको जिम्मेवारी दिएको राखेपले जनाएको थियो।