देवसहित ४० खेलाडी नेपाल ‘ए’ को प्रारम्भिक टोलीमा

काठमाडौँ- नेपाल क्रिकेट संघ (क्यान)ले आयरल्यान्ड ‘ए’सँग हुने शृंखलाको लागि देव खनालसहित ४० खेलाडीलाई प्रारम्भिक टोलीमा बोलाएको छ। क्यानले सोमबार ४० खेलाडीको नाम सार्वजनिक गर्दै टोलीमा बोलाएको हो। 

टोलीमा देवसहित विनोद भण्डारी, सन्दीप जोरा, भीम सार्की, आरिफ शेख, पवन सर्राफ, अर्जुन साउद, विवेक यादव, अर्जुन कुमाल, हेमन्त धामी, सागर ढकाललगायत ४० जना रहेका छन्।

कीर्तिपुरस्थित त्रिवि क्रिकेट मैदानमा हुने शृंखलामा नेपाल ‘ए’ले आयरल्यान्डसँग तीन खेलको एक दिवसीय (ओडी) र तीन खेलको टी२० खेल्ने छ। त्यसअघि सिनियर टोलीले आयरल्यान्ड ‘ए’सँग चैत ११ र १२ गते टी२० खेल खेल्ने छ।

त्यसपछि नेपाल ‘ए’ले १५, १६ र १८ गते आयरल्यान्डसँग खेल्ने छ। त्यसपछि एक दिवसीय शृंखला हुने छ। पहिलो खेल चैत २१ मा हुने छ। दोस्रो खेल चैत २३ र अन्तिम खेल २५ गते हुने छ।