आईसीसी अध्यक्षले नेपाल भ्रमण गर्ने

काठमाडौं । अन्तराष्ट्रिय क्रिकेट परिषद् आईसीसीका अध्यक्ष ग्रेग बार्कलेले नेपाल भ्रमण गर्ने भएका छन् । 

नेपाल क्रिकेट संघ क्यानले बुधबार बिज्ञप्ति जारी गर्दै आईसीसी अध्यक्षले चार दिने नेपाल भ्रमण गर्ने पुष्टि गरेको छ । 

बार्कले आगामी सोमबार नेपाल आउने र चार दिने भ्रमण सकेर फर्कने क्यानले जनाएको छ । आईसीसी अध्यक्षको नेपाल भ्रमण नेपाली खेलकुद विकासको अवसरका रुपमा रहने क्यानले जनाएको छ । 

बार्कलेले नेपाल भ्रणको दौरान त्रिवि क्रिकेट मैदान र मुलपानी क्रिकेट मैदानको निरिक्षण गर्नेछन् । सो दौरान उनले प्रधानमन्त्री, अर्थमन्त्री, खेलकुद मन्त्री लगायतलाई भेट गर्ने तालिका रहेको क्यानले जनाएको छ । उनले भेटको दौरान क्रिकेटमा सहयोग, अनुदानको अवसर र नेपालको नीतिसँग जोडिने सन्दर्भमा कुराकानी गर्नेछन् । 

बार्कलेले सन् २०२७ को यू–१९ वुमन्स विश्वकप नेपालले सह–आयोजना गर्ने विषयमा त्रिवि मैदान र मुलपानी मैदानको निरिक्षण गर्ने बताएका छन् । 

क्यान अध्यक्ष चुतरबहादुर चन्दले आईसीसी अध्यक्षको नेपाल भ्रमणले क्रिकेट विकासमा महत्वपुर्ण प्रभाव पार्ने उल्लेख गरेका छन् ।