काठमाडौं । विघटित नेपाल तेक्वान्दो संघले राष्ट्रिय खेलकुद परिषद (राखेप) ले गैरजिम्मेवार र अबैधानिक कार्य गरेको आरोप लगाएको छ ।
तेक्वान्दो संघले बिहीबार एक विज्ञप्ति निकाल्दै संघलाई विघटन गर्नु राखेपको गैरजिम्मेवार र अबैधानिक कार्य भएको दाबी गरेको छ ।
राखेपले राष्ट्रिय खेलकुद विकास ऐनको कार्यान्वयनका लागि भन्दै तेक्वान्दोसहित उसु र बडिबिल्डिङ संघलाई मंगलबार विघटन गरेको थियो ।
राखेपले अस्तित्वमा रहेको नेपाल तेक्वान्दो संघ र राष्ट्रिय तेक्वान्दो संघको दर्ता खारेज गरेको हो ।
यस्तै राखेपले प्रदीप जोशी अध्यक्ष र इन्द्रमान तुलाधर महासचिव रहेको नेपाल तेक्वान्दो महासंघ दर्ता गरेको छ । राखेपले उक्त समितिलाई तीन महिनाभित्र स्थानीय तहहुँदै केन्द्रसम्मको निर्वाचन गर्ने जिम्मेवारी समेत दिएको छ ।
तर, राखेपको यस कार्यले तेक्वान्दो खेल, खेलाडी र प्रशिक्षकहरूको भविष्यमाथि खेलवाड भएको समेत संगले जारी गरेको विज्ञप्तिमा उल्लेख गरिएको छ ।
'राष्ट्रिय खेलकुद परिषदको यो गैरजिम्मेवार र अबैधानिक कार्यको घोर भर्त्सना गर्दै तेक्वान्दो खेल, खेलाडी र प्रशिक्षकहरूको भविष्यमाथि खेलवाड गर्ने यस परिषद विरूद्ध एक हुन र आआफ्नो तह र तप्काबाट यसको सामना गर्न यस संघ आव्हान गर्दछ,' अध्यक्ष प्रकाश समशेर राणाले हस्ताक्षर गरिएको विज्ञप्तिमा भनिएको छ, 'राष्ट्रिय खेलकुद परिषद्को यस गलत क्रियाकलाप र समाजलाई लज्जित गर्ने कार्यको विरोध गर्दै सम्पुर्ण खेलाडी, प्रशिक्षक, खेल संघ, शुभचिन्तक, अभिभावक र नेपाली जनताबाट विरोध गर्दै एकजुट हुन हार्दीक अपिल गर्दछौं ।'
राष्ट्रिय खेलकुद विकास ऐनले एक खेलको लागि एउटा मात्र खेल संघ गठन भएको हुनुपर्ने व्यवस्था गरेको छ ।
ऐनको धारा २६ को दफा ५ को उपदफा (४) मा परिषदमा दर्ता गर्दा एक खेलको लागि एकभन्दा बढी तथा एकै उद्धेश्य वा समान नाम भएका एकभन्दा बढी संघ वा महासंघलाई दर्ता गरिने छैन भन्ने उल्लेख छ ।
ऐनको दफा ६ को उपदफा ५ मा ऐन प्रारम्भ हुदाँको बखत एउटै खेलको लािग एकभन्दा बढी खेल संघ वा महासंघ गठन भएका रहेछन् भने ऐन लागू भएको मितिले तीन महिनाभित्र एउटै खेल संघ वा महासंघ गठन गरी दर्ताका लागि परिषद्ले सुचना निकाल्ने उल्लेछ ।
-1732712797.jpeg)
