लिगको तयारीमा एन्फासँग क्लबहरुको असन्तुष्टि

काठमाडौं । आसन्न शहिद स्मारक ए डिभिजन लिगको तयारीको सन्दर्भमा अखिल नेपाल फुटबल संघ (एन्फा)सँग ए डिभिजनका क्लबहरुले असन्तुष्टि जनाएका छन् । 

पुस १४ गतेबाट सञ्चालन गर्ने निर्णय गरिएको शीर्ष डिभिजनको लिगको तयारीमा फुटबल संघ गम्भिर नबनेको भन्दै ए डिभिजनका क्लबले असन्तुष्टि जनाएका हुन् ।

लिगको तयारी खर्च वापतको ५० प्रतिशत रकम मंसिर १५ गतेभित्र उपलब्ध गराउने पूर्व सहमती एन्फाले पालना नगरेको क्लबहरुको आरोप छ । एन्फाले लिगको तयारी खर्च वापत ए डिभिजन क्लबलाई प्रति क्लब ३२ लाख ५० हजार रुपैयाँ दिने निर्णय गरेको थियो । सो वापतको आधा रकम मंसिर १५ भित्र किस्तामा भुक्तानी गर्ने एन्फा र क्लबबीच सहमती बनेको थियो । 

क्लबहरुले एन्फासँग गत सिजनको तयारी खर्च, पुरस्कार वापतको रकम पनि पाउन बाँकी छ । नयाँ सिजनको लिग सुरु गर्ने सन्दर्भमा एन्फा र क्लबले आन्तरिक छलफल गरि अघिल्लो वर्षको बाँकी रकम र नयाँ सिजनको तयारी वापतको ५० प्रतिशत रकम मंसिर १५ भित्र भुक्तानी गर्ने सहमती बनेको थियो । तयारी खर्चको सन्दर्भमा सहमती बनेपछि पुस २६ गतेबाट लिग सुरु गर्ने औपचारिक निर्णय गरेको थियो । 

तर पूर्व सहमती अनुसार एन्फाबाट मंसिर १६ गतेसम्म समेत क्लबले तयारी खर्च नपाएपछि लिगको तयारीको सन्दर्भमा क्लबहरुले असन्तुष्टि जनाएका छन् । 

आसन्न लिगको सन्दर्भमा ए डिभिजनका अधिकांश क्लब शनिबार साँझ अनौपचारिक छलफलमा जुटेका थिए । एन्फाको झुठो आश्वासनले लिगनै अन्यौलमा पर्ने देखिएको भन्दै क्लबहरुले फुटबल संघको गम्भिर ध्यानाकर्षण गराउने सहमती जुटाएका छन् । 

‘लिगको मिति आईसकेको छ । तर एन्फाबाट तयारी खर्च नपाउँदा क्लबले तयारी अघि बढाउन सकेका छैनन् । लिग हुने, नहुने अन्यौलता कायमै देखिन्छ ।’ बैठकमा सहभागी एक क्लबका प्रतिनिधिले खेलपाटीसँग भने, ‘लिगको तयारीका लागि एन्फाको गृहकार्यपनि देखिदैन । लिगको प्रायोजक, प्रत्यक्ष प्रशारण अधिकार सम्बन्धि सम्झौता लगायतका विभिन्न विषयमा कुनै काम भएको छैन । यसले एन्फा लिग नगर्ने दिशामा उन्मुख रहेको देखिन्छ ।’

एन्फाले यस पटक लिगलाई डबल राउण्डमा सञ्चालन गर्ने निर्णय गरेको छ । साथै क्लबलाई तयारी वापतको ३२ लाख ५० हजार रुपैयाँ दिने घोषणा गरेको छ । तर नियमित आय स्रोत नभएको एन्फाले क्लबलाई तयारी वापतको यति ठुलो रकम दिन गाह्रो देखिन्छ ।

लिगको तयारीमा जुट्नुपर्ने एन्फा नेतृत्व विश्वकप फुटबलको बाहानामा कतारतिर बरालिएपछि पुस २६ गतेको लिगको ‘डेटलाइन’मा आशंका उत्पन्न भैरहेको छ ।