नवौं राष्ट्रियको ट्रफ्री कर्णालीमा अनावरण 

काठमाडौं । गण्डकी प्रदेशको पोखरामा आयोजना हुने नवौं  राष्ट्रिय खेलकुद प्रतियोगिताको ट्रफ्री कर्णाली प्रदेशका मुख्यमन्त्री जीवन बहादुर शाहीले अनावरण गरेका छन् । 

पोखरामा यहि असोज २८ देखि कार्तिक ३ गते सम्म संचालन  हुने प्रतियोगिताको ट्रफी मुख्यमन्त्री शाहीले सुर्खेतको राजधानी वीरेन्द्रनगरमा अनावरण गरेका हुन् । 

राष्ट्रिय खेलकुद परिषद राखेपले नवौं राष्ट्रिय खेलकुद प्रतियोगिताको ट्रफ्री असोज १ गतेबाट ओलम्पीयन दिपक विष्टको संयोजकत्वमा सात प्रदेश र तीन विभागिय टिममा ट्रफ्री टुर गराउने निर्णय गरेको थियो । 

मुख्यमन्त्री जिवनबहादुर शाहीले खेलाडीको हितका लागि सबभन्दा अग्रसर रहेर कर्णाली प्रदेशले काम गरिरहेको बताएका थिए ।

ट्रफी अनावरण कार्यक्रममा बोल्दै मुख्यमन्त्री शाहीले यस प्रदेशका खेलाडीको लागि महत्वाकांक्षी रंगशाला निर्माणदेखि खेलाडीको हौसला बढाउने काममा सरकार निरन्तर लागिपरेको बताए ।

'यस सरकारले खेल र खेलाडीका लागि आफ्नो श्रोत अनुसारको बजेट ब्यवस्थापन गरेको छु ।' उनले भने, 'खेलकुदलाई प्राथमिकता दिएरनै म खेलाडीको अगाडि उपस्थित भएको छु ।' 

ट्रफी जितेर ल्याउन सबै खेलाडीलाई आग्रह गर्दै उनले नवौंमा यसको सपना देख्न आग्रह गरे । नवौंमा खेल मार्फतनै कर्णालीलाई चिनाउन उनको आग्रह थियो ।

ओलम्पियन तथा ट्रफी टुरका संयोजक दिपक बिष्टले पुलिस, आर्मी क्लब लगायत सबभन्दा राम्रा खेलाडी पश्चिम नेपालकै रहेको भन्दै उत्साहका साथ नवौं खेलकुदमा सहभागी हुन आग्रह गरे । 

ट्रफीले कर्णाली प्रदेशको खेलाडी र प्रशिक्षकको मनोबल बढाउने अपेक्षा रहेको उनको भनाइ थियो ।

'पहिलोपटक यो ट्रफी टुरको आयोजना गरिएको छ । यसले खेल क्षेत्रमा केही हुन्छ कि भन्ने अपेक्षा छु ।' उनले भने ।

नवौं प्रतियोगिता मार्फत ट्रफी कर्णालीमै ल्याउन उनले आग्रह गरे ।

राष्ट्रिय खेलकुद प्रतियोगिताको रनिङ ट्रफी टुरमा संयोजक विष्ट सहित अन्तर्राष्ट्रिय खेलाडी संघका अध्यक्ष समेत रहेका सागका दोहोरो स्वर्ण पदक विजेता दीपक श्रेष्ठ, महिला भलिबल टोलीकी कप्तान अरुणा शाही र अल्ट्रा म्याराथन धावक मिरा राई सहभागि भएका छन् । 

कार्यक्रममा  बोल्दै कर्णाली प्रदेश खेलकुद परिषद्का सदस्य सचिव विश्वामित्र सञ्यालले कर्णालीबाट नवौंमा सहभागि भई स्वर्ण, काँस्य र  रजत  पदक ल्याउने खेलाडीलाई क्रमशः दुई लाख, डेढ लाख र एक लाख नगर पुरस्कार दिने बताए ।
 
नवौं राष्ट्रिय खेलकुद प्रतियोगितामा कर्णालीबाट ४ सय ९८ जना खेलाडीले २९ वटा खेलमा प्रतिस्पर्धा गर्नेछन् ।