नवौं राष्ट्रिय खेलकुद : पुरुष क्रिकेटको थप दुई खेल रद्द   

काठमाडौं । नवौं राष्ट्रिय खेलकुदको पुरुष क्रिकेट अन्तर्गत आज शुक्रबार तय भएको थप दुई खेल रद्द भएको छ ।

वर्षाको कारण सुदुरपश्चिम प्रदेश र बागमती प्रदेश तथा त्रिभुवन  आर्मी क्लब र कर्णाली प्रदेशबीचको खेल रद्द भएको हो । दुबै  खेल टस समेत नभई रद्द भएको हो ।

आर्मी र कर्णालीबीचको खेल मुलपानी मैदानमा हुने तय थियो । यस्तै कीर्तिपुरको टियु मैदानमा सुदुरपश्चिम र बागमतीबीच खेल तय थियो।

आर्मीको पहिलो खेल रद्द भएको हो । कर्णालीको लगातार दोस्रो खेल रद्द भएको हो ।

बागमतीको लगातार दोस्रो खेल रद्द हुदा सुदुर भने पहिलो खेलमा पराजित भएको थियो ।

 गण्डकी प्रदेशमा आयोजना हुने नवौं राष्ट्रिय खेलकुद असोज २८ देखि कात्तिक ३ सम्म आयोजना हुनेछ । तर, पुरुष क्रिकेट भने अगाडी नै आयोजना भईरहेको हो ।

 प्रतियोगितामा तीन विभागिय,सात प्रदेश तथा एनआरएनको टोली गरी ११ टोलीको सहभागीता रहेको छ । सहभागी ११ टोलीलाई दुई समूहमा विभाजन गरिएको छ ।