नवौं हुनेमा कुनै सन्देह नगर्नुस : मन्त्री गहतराज

काठमाडौं । युवा तथा खेलकुद मन्त्री महेश्वरगंज गहतराजले नवौं राष्ट्रिय खेलकुद प्रतियोगिता समयमै सम्पन्न हुने कुरामा कुनै सन्देह नगर्न आग्रह गरेका छन् । 

पोखरा रंगशालामा आईतबार प्रतियोगिताको कार्यकारी समितिको सचिवालय उद्घाटन गर्दै मन्त्री गहतराजले नवौं राष्ट्रिय खेलकुद तोकिएको मितिमै सम्पन्न हुने बताए । 

उनले आसन्न संसदीय निर्वाचनले प्रतियोगिताको आयोजनामा कुनै असर नगर्ने समेत उल्लेख गरेका छन् । 

मन्त्री गहतराजले नवौं राष्ट्रिय खेलकुदका लागि सरकारले आवश्यक रकम विनियोजन गरेको उल्लेख गर्दै तालिका अनुसार प्रतियोगिताको तयारीको काम अघि बढेको बताए ।

‘खेलकुदको सबैभन्दा ठुलो महोत्सव पोखरामा हुदैछ । प्रतियोगिताले खेलसँगै यहाँको पर्यटनमा समेत महत्वपुर्ण भुमिका खेल्छ ।’ उनले भने । 

मन्त्री गहतराजले प्रतियोगितालाई सफलतापूर्वक आयोजना गर्न तीनै तहको सरकारको सामुहिक प्रतिबद्धताको खाँचो रहेको उल्लेख गरेका छन् । सरकारले नवौं राष्ट्रिय खेलकुद असोज २८ देखि कात्तिक ३ गतेसम्म गण्डकी प्रदेशमा आयोजना गर्दैछ ।

मन्त्री गहतराजले पोखरा रंगशालामा आईतबार प्रतियोगिताको कार्यकारी समितिको सचिवालयको औपचारिक उद्घाटन समेत गरेका छन् । कार्यक्रममा राखेपका उपाध्यक्ष शिव कोईराला ज्वाला सहित स्थानीय र प्रदेश सरकारका प्रमुखको उपस्थिती रहेको थियो ।