काठमाडौं । प्रदेश नम्बर एकका खेलकुद विकास बोर्डका सदस्य सचिव हंशराज वाग्लेले एउटै राष्ट्रिय खेलकुद संघका चार वटा टोली सम्म आफुहरु आधिकारिक भन्दै प्रदेशमा आउन थालेको बताएका छन् । नवौं राष्ट्रिय खेलकुदको तयारीमा रहेको प्रदेश खेलकुदमा एउटै संघका विभिन्न टोलीहरु आफुहरु आधिकारिक भन्दै आउन थालेको सदस्य सचिव वाग्लेले गुनासो गरेका हुन् ।
राष्ट्रिय खेलकुदको सन्दर्भमा प्रदेश नम्बर एकको खेलकुद विकास बोर्डले तयारी अघि बढाएको छ । बोर्डले नवौंमा सहभागी ३६ खेलका प्रतिनिधिसँग समन्वय गर्दै तयारी अघि बढाउने तयारी गरेको हो । तर एउटै खेलकुद संघका चार वटा टोलीसम्म आफुलाई आधिकारिक भन्दै प्रदेशमा पुग्न थालेपछि प्रदेश खेलकुदलाई समस्या थपिएको छ ।
‘एउटै संघका विभिन्न मान्छे आफुलाई आधिकारिक भन्दै प्रदेशमा आउन थाले । एउटै संघका ४ वटासम्म टोली आउँछ ।’ सदस्य सचिव वाग्लेले खेलपाटीसँग भने, ‘राष्ट्रिय संघसँग छलफल गरेर अघि बढ्ने तयारी प्रदेशको छ ।’
एकै प्रकृतिका धेरै संघको विवाद खेलकुदमा नयाँ हैन । ऐनलेनै तीन महिनाभित्र एकै प्रकृतिका खेल संघलाई एकिकरण गरेर विवाद समाधानका लागि समय सिमा तोकेको थियो । तर ऐन कार्यान्वयन हुन नसक्दा एकै प्रकृतिका एउटै संघ मात्र राखेपमा दर्ता हुने ऐनको व्यवस्थाले सार्थकता पाउन सकेको छैन ।
केन्द्रमा देखिदै आएको संघको आधिकारिकताको विवाद अब प्रदेशमा पनि देखिन थालेको छ । संविधानले खेलकुदलाई साझा अनुसुचिको विषयमा राखेपनि संघ दर्ताको प्रक्रिया र कानुन फरक फरक छन् । प्रदेश कानुन अनुसार प्रदेशमा प्रदेश खेल संघ दर्ता हुनुपर्ने व्यवस्था राष्ट्रिय खेलकुद विकास ऐनमै छ ।
राष्ट्रिय खेलकुद प्रतियोगिताको तयारी गरिरहेका प्रदेशले सम्बन्धित खेलको प्रदेश संघसँग समन्वय गरेर अघि बढ्नुपर्ने हुन्छ । तर अधिकांश संघ प्रदेशमा दर्ता छैनन् । प्रदेशमै संघ दर्ता नभएपछि कुन संघ वा कुन पदाधिकारी आधिकारिक भन्ने विषयमा प्रदेश खेलकुद समस्यामा परेको छ ।
प्रदेश नम्बर एकका खेलकुद बोर्डका सदस्य सचिव वाग्लेले नवौंको तयारीको सन्दर्भमा छलफल गर्न राष्ट्रिय संघका प्रतिनिधिलाई प्रदेशमा बोलाएर अघि बढ्न खोजिएको खेलपाटीलाई बताए ।
‘नवौंमा सहभागी २६ वटै खेलका संघका प्रतिनिधिलाई भदौ २ गते प्रदेशमा बोलाएको छ । संघसँग प्रदेश कसरी अघि बढ्ने भन्ने विषय छलफलको मुख्य एजेण्डा छ ।’ वाग्लेले भने, ‘प्रदेश र संघ एक साथ भएर अघि बढ्ने कि बाइपास गरेर जाने भन्ने विषयको अब टुङ्गो लाग्छ ।’
‘प्रतियोगिताको निर्देशिकाले राखेपका संघलाई संगै लगेर जाने भनेर संकेत गरेको छ । तर संघको अनिवार्यता भन्ने देखिदैन । संघलाई बाइपास गरेर जाने पक्षमा प्रदेश छैन । सक्रियता देखाए संगै लैजान्छौं । नत्र आफ्नै ढङ्गले प्रदेश अघि बढ्छ ।’ उनले थपे ।
