काठमाडौं । अखिल नेपाल फुटबल संघ (एन्फा)ले घरेलु लिग र अन्यौल अवस्थामा रहेको फ्रेन्चाइज फुटबल नेपाल सुपर लिग (एनएसएल)को बारेमा निर्णय गर्न बोलाएको छलफललाई स्थगित गरेको छ ।
एन्फाले आईतबार ए डिभिजनका क्लबसँग आसन्न घरेलु लिग र एनएसएलको विषयमा औपचारिक छलफल गर्न बैठक बोलाएको थियो । तर अन्तिम समयमा प्राविधिक कारण देखाउँदै एन्फाले छलफल स्थगित गरेको छ ।
एन्फाले क्लबसँगको छलफल अघिल्लो सातानै राख्ने गरि सुचना दिएको थियो । केही समयमै तयारी नपुग्ने भन्दै आईतबारका लागि नयाँ सुचना जारी गरियो । तर आईतबार पनि बैठक बस्न सकेन । प्राविधिक कारण भन्दै अन्तिम समयमा छलफल स्थगित गरिएको छ ।
ए डिभिजन क्लबका एक पदाधिकारीले प्राविधिक कारणले बैठक स्थगित गरेको सुचना आफुले प्राप्त गरेको खेलपाटीलाई बताए । थप विषय एन्फाले खुलाएको छैन ।
चुनाव जितेर आएपछि नवनिर्वाचित अध्यक्ष पंकजबिक्रम नेम्वाङले एजेण्डा सहितको बैठक राख्न सकेका छैनन् । एजेण्डा सहित राखिएको पहिलो बैठक सुरु भएको केहीबेरमै विवाद बढेपछि स्थगित गरिएको थियो ।
निर्वाचित भएर आएपछि फुटबल गतिविधि र कार्यक्रम भन्दा नियुक्ति र मनोनयन प्राथमिकतामा परेपछि नयाँ अध्यक्ष नेम्वाङ आलोचित छन् । संघका नवनिर्वाचित पदाधिकारी र कार्यसमिति सदस्य नियुक्तिको दाउपेचमा लागेपछि फुटबल गतिविधिका एजेण्डा अलपत्र छन् । एन्फाको नयाँ टिमले फुटबलको क्यालेन्डर सार्वजनीक गर्न सकेको छैन । बजेट सहित क्यालेन्डर पास गर्ने विशेष साधारण सभा बोलाउन नेतृत्वको रुचि देखिदैन ।
एन्फाको पछिल्लो कार्यसमिति बैठकमा समेत विशेष साधारण सभाको एजेण्डा नेम्वाङको सचिवालयले राखेको थिएन । एजेण्डामा फुटबलका कार्यक्रम नआएको भन्दै विशेष साधारण सभा र लिगको मिति तय गर्नुपर्ने एजेण्डा थपेर उपाध्यक्ष कुमार केसीले एन्फामा निवेदन दर्ता गराएका थिए । तर एन्फाको वर्तमान संस्थापन पक्षबीचकै नियुक्तिको विवादले बैठक बस्न सकेन ।
एन्फाको कार्यसमिति बैठक अघि एन्फा सचिवालयले एनएसएलको विषयमा असन्तुष्ट रहेका ए डिभिजनका चार क्लबसँग छलफल गरेको थियो । चार क्लबले एनएसएलसँगको सम्झौता रद्ध गर्नुपर्ने निर्णय गर्दै एन्फा कार्यसमितिमा प्रस्ताव लैजाने सहमती जुटाएका थिए । तर एनएसएलको विषयमा चार क्लबसँग मात्र छलफल गरेको भन्दै ए डिभिजनका अन्य क्लब असन्तुष्ट छन् । त्यसपछि एन्फाले ए डिभिजनका सबै क्लबलाई आसन्न लिग र एनएसएलको विषयमा छलफल गर्न बोलाएको थियो ।
तत्काल घरेलु फुटबल सुरु गर्ने अवस्थामा नरहेको एन्फासँग खेलाडीलाई व्यस्त राख्ने कार्यक्रम सार्वजनीक गर्नुपर्ने दबाब छ । त्यसमा एनएसएलसँगको सम्झौता रद्ध गर्न ठुला क्लबको दबाब अर्कोतिर छ ।
