एन्फा बैठक भोलि : एक अर्कालाई गलाउने रणनीति

काठमाडौं । अखिल नेपाल फुटबल संघ (एन्फा)को कार्यसमिति बैठक पेचिलो बन्ने भएको हो । प्यानल सहित चुनावी प्रतिस्पर्धामा उत्रिएका दुई समुह निर्वाचनको नतिजासँगै एक अर्कालाई गलाउने रणनीतिका साथ कार्यसमिति बैठकमा प्रस्तुत हुने तयारी गरेका छन् । एन्फाको निर्वाचित कार्यसमितिको सूचना र एजेण्डा सहितको पहिलो बैठक भोलि सोमबार बस्दैछ । बैठक अघि तीन वटा पक्षले आफ्नो समूहको आन्तरिक बैठक र छलफललाई सघन बनाएर नेतृत्व र विपक्षमा रहेको समुहमाथि दबाब बढाउने तयारी थालेका छन् । एन्फाको पछिल्लो चुनावबाट नवनिर्वाचित अध्यक्ष पंकजबिक्रम नेम्वाङ, पूर्व अध्यक्ष कर्माछिरिङ शेर्पा र गणेश थापाको तीन वटा समूह बनेको छ । 

आकस्मिक रुपमा पहिलो बैठक एन्फा नवनिर्वाचित अध्यक्ष पंकजबिक्रम नेम्वाङले महासचिव, कोषाध्यक्ष, अन्तराष्ट्रिय सम्बन्ध विभाग प्रमुख जस्ता पदमा आफु अनुकुल निर्णय गराएका थिए । पहिलो बैठकमा ठाडो प्रस्तावमा एजेण्डा पास गराएका नेम्वाङ दोस्रो बैठक अघि भने दबाबमा छन् । नविन पाँडेलाई अन्तराष्ट्रिय सम्बन्ध विभाग प्रमुख नियुक्त गर्ने नेम्वाङको पहिलो बैठकको निर्णयनै विवादमा परेको थियो । सो निर्णयको एन्फाका पूर्व अध्यक्ष गणेश थापाले समेत विरोध गरेका थिए । थापा अहिले नेम्वाङ बिराजमान रहेको एन्फा अध्यक्षको कुर्सीको मुख्य ‘टेको’ हुन् ।

नेम्वाङले दोस्रो बैठकमा ११ वटा विभिन्न एजेण्डा राखेर कार्यसमिति बैठक आह्वान गरेका छन् । जसमा एजेण्डा नम्बर ७ मा रहेको विभिन्न पदाधिकारीको नियुक्तिमा सबैको ध्यान केन्द्रित छ । चुनाव अघि महासचिवको रुपमा चर्चामा आएका गणेश थापाका छोरा गौरव थापालाई व्यवस्थापन गर्नुपर्ने चुनौती नेम्वाङसँग छ । सोमबारको बैठकमा प्रक्रिया मिलाएर सिइओ वा सहायक महासचिवको पहिलो नम्बरमा गौरवलाई नियुक्ति दिने तयारी छ । आफैले भ्रष्ट्राचारको मुद्धामा प्रतिबन्धसम्म पुर्याएका गणेश थापाका छोरालाई देखिने गरि एन्फामा जिम्मेवारी दिने विषय नेतृत्वलाई सकस छ । 

गणेश थापा दोस्रो बैठकमार्फत छोराको भुमिकामा ‘क्लियर’ गर्न खोजेपछि नेम्वाङ समुहकै केही अधिकारी रुष्ट बनेका छन् । खेलाडी र खेल विकासको एजेण्डालाई ओझेलमा पारेर फुटबललाई पैतृक सम्पती जसरी प्रयोग गर्न खोजिएको भन्दै नेम्वाङ समुहका नविन पाँडेले सार्वजनीक अभिव्यक्तिमार्फत चेतावनीनै दिएका छन् । उनको सार्वजनीक चुनौतीले गणेश थापाको जोडबलमा हुन लागेको एन्फाको पदाधिकारी नियुक्तिलाई थप प्रस्ट गर्छ । 

पाँडेमात्र हैन कार्यसमिति बैठकको एजेण्डामा खेल र खेलाडीको विषय समावेश नभएको भन्दै उपाध्यक्ष कुमार केसीले एजेण्डा थप गर्न भन्दै महासचिवसँग पत्रनै दर्ता गराएका छन् । उनले रोकिएको महिला लिग, हुन नसकेको राष्ट्रिय लिग र घरेलु फुटबलका तीन वटा डिभिजनका फुटबल र युथ प्रतियोगिता ललित स्मृतिको एजेण्डामा निर्णय गरेर कार्यक्रम कार्यान्वयन गर्नुपर्ने भन्दै पत्र दर्ता गराएका छन् । वर्तमान फुटबल नेतृत्व राजनीति र पदाधिकारी नियुक्तिमा मात्र केन्द्रित रहेको भन्दै उनले फुटबलका कार्यक्रमलाई एजेण्डामा थप गरेर निर्णय गर्न अध्यक्ष नेम्वाङलाई दबाब बढाएका छन् । कार्यसमिति बैठक अघिनै एन्फाको खेलाडी संघले वार्षिक क्यालेन्डरको माग गर्दै अध्यक्ष नेम्वाङलाई ज्ञापन पत्र बुझाईसकेको छ ।

चुनावी परिणाम लगत्तै चिसिएको नेम्वाङ र थापाको सम्बन्ध दोस्रो बैठक अघि सामान्य अवस्थामा फर्किसकेको छ । सोही कारण बहुमतका आधारमा एजेण्डा पास गर्ने नेम्वाङको तयारी छ । तर नेतृत्वमा पुग्नु अघि नेम्वाङ पक्षले उठाउँदै आएको राष्ट्रिय लिग, स्थगित अवस्थामा रहेको महिला लिग र अनिश्चित बनेको घरेलु लिगको मिति घोषणा गरेर जानुपर्ने भन्दै विपक्षी समुहको नेतृत्वमाथि दबाब बढाउने रणनीति छ । 

एन्फाको प्रस्तावित एजेण्डा :

 

उपाध्यक्ष कुमार केसीले एजेण्डा थप गर्न माग गर्दै दर्ता गरेको पत्र :