अन्तराष्ट्रिय पदक विजेता खेलाडी सम्मानित

काठमाडौं । बज्रबाराही मुँवा थाई क्लब र टिकाभैरव बुदोकैदो शाखाले संयुक्त रुपमा अन्तराष्ट्रिय पदक विजेता खेलाडीहरुलाई सम्मान गरेको छ ।

सम्मानित हुने खेलाडीहरुमा र १९ र २० अगष्टमा थाईल्याण्डमा सम्पन्न दोश्रो थाईल्याण्ड गभरमेन्ट अथोरिटी क्योकुशिन अन्तराष्ट्रिय प्रतियोगितामा खुला तौल समूहमा प्रथम स्थान हात पार्ने विजय सिंह र तेश्रो स्थान हात पार्ने कवीराज माली तथा ३५ केजी तौलमा रजत पदक प्राप्त खेलाडी दिपेश सापकोटा रहेका छन् ।

विजयले ईन्डोनेसियामा ६ र ७ अगष्टमा आयोजना भएको अन्तराष्ट्रिय मैत्रीपूर्ण क्योकुशिन प्रतियोगितामा खुला तौलमा बेष्ट फाईटर उपाधी समेत हात पार्न सफल भएका थिए ।

यस्तै नेपालमा आयोजना भएको तेश्रो केब्याग अन्तराष्ट्रिय मुँवाथाई च्याम्पियनसिप प्रतियोगितामा स्वर्ण पदक प्राप्त गर्ने शर्मिला गुरुङ्ग ४५ केजी, गुणराज खचाल ६० केजी, रावल श्रेष्ठ ६५ केजी, सन्देश मानन्धर ७० केजी तथा ५५ केजीमा रजत पदक प्राप्त गर्ने कविन देशार रहेका छन् ।

तिहार, छठ तथा नेपाल संवतको उपलक्षमा आयोजित चियापान तथा खेलाडी सम्मान कार्यक्रमको आयोजना गर्दै खेलाडीहरुलाई सम्मान गरिएको हो ।

खेलाडीहरुलाई गोदावरी नगरपालिकाका मेयर गजेन्द्र महर्जनले सम्मान पत्रद्वारा सम्मानित गरेका थिए ।