काठमाडौं । एभरेष्ट प्रिमियर लिग (ईपीएल) क्रिकेटको ६ फ्रेन्चाइज टोलीले नेपाल क्रिकेट संघ (क्यान) ले सम्पूर्ण खेलकुद कार्यक्रम बहिस्कार गर्ने चेतवानी दिएको छ ।
ईपीएलको फ्रेन्चाइज टोलीले सोमबार पत्रकार सम्मेलनको आयोजना गर्दै क्यानले आयोजना गर्ने खेलकुद कार्यक्रम बहिस्कार गर्ने चेतावनी दिएको हो ।
क्यानले गत बुधबार संघको आधिकारिक फ्रेन्चाइज क्रिकेट प्रतियोगिता नेपाल टी-ट्वान्टी लिगको घोषणा गर्दै ईपीएललाई मान्यता नदिने जनाएको थियो ।
यता, ईपीएलले भने पाँचौं संस्करणको मिति घोषणा गरिसकेको थियो ।
आयोजक ईपीएल क्रिकेटले पाँचौं संस्करणको प्रतियोगिता आगामी कात्तिक २६ देखि मंसिर १० गतेसम्म हुने जनाएको छ ।
तर क्यानले नयाँ प्रतियोगितालाई मान्यता दिएर ईपीएल टिमको भविष्य अन्धकार बनाएको फ्रेन्चाइज टिमले आरोप लगाएको छ ।
क्यानले पछिल्लो निर्णय कार्यन्वयन गरेमा आफुहरुले समर्थन नगर्ने र क्यानको कार्यक्रम बहिस्कार गर्ने फ्रेन्चाइज टिमले जारी गरेको विज्ञप्तिमा उल्लेख गरिएको छ ।
'क्यानले आफ्नो पछिल्लो निर्णयलाई समर्थन र कार्यान्वयन गर्छ भने हामी समर्थन गर्दैनौं र अबदेखि क्यानले आयोजना गर्ने सबै खेलकुद कार्यक्रमहरूलाई पूर्ण रूपमा बहिष्कार गर्नेछौं,' विज्ञप्तिमा भनिएको छ ।
देशको खेल विकासमा ईपीएल र फ्रेन्चाइज टिमले निर्णायक भूमिका खेलेको समेत विज्ञप्तिमा उल्लेख गरिएको छ ।
-1741277810.jpeg)
