सिता भन्छिन्, 'क्यानको निर्णय स्वीकार्नुपर्छ, खुशी नै छु'

काठमाडौं । नेपाली राष्ट्रिय क्रिकेट टोलीका अलराउण्डर सिता राना मगरले उपकप्तानबाट हटेपनि आफु खुशी नै रहेको बताएकी छिन् ।

टियु क्रिकेट मैदानमा मंगलबार संचारकर्मीसँग कुरा गर्दै सिताले नेपाल क्रिकेट संघ (क्यान) को निर्णय स्वीकार गर्नुपर्ने बताउँदै आफु खुशी नै रहेको बताईएकी हुन् ।

सिताले आफुलाई कुनै समय कप्तानीको रुपमा हेरेको बताईन् । उनले आफुले एपीएफक क्लबको लागि नेतृत्व गर्दै राम्रो नतिजा दिईरहेको समेत बताईन् ।

'कप्तानीको दाबेदार लाग्थ्यो तर मैले क्यानको निर्णय स्वीकार गर्नु पर्छ । म खुशी नै छु, सिनियर खेलाडीको रुपमा खेलिरहेको छु,' सिताले भनिन्, 'मैले एपीएफ टिमलाई नेतृत्व गरेर नतिजा दिईरहेको छु । खुशी छु एपीएफमा मेरो कदर भईराखेको छ ।'

लामो समय उपकप्तान रहेकी सिताले भविष्यको लागि सोचेर क्यानले यस्तो निर्णय गरेको भन्ने आफुलाई लागेको बताईन् ।

'क्यानले राम्रै सोच्नु भएको हो । भविष्यको लागि सोच्नु भएको होला । मैले पनि मिडियाबाटै थाहा पाएको हो । फाइनलको लागि जादै थिए । राम्रै गर्नु भएको होला निर्णय थियो होला,' सिताले थपिन 'योङ प्लेयरलाई ग्रुम गर्नलाई गर्नु भएको होला । अझै अर्को नयाँ खेलाडी ल्याएर कप्तान र उपकप्तान बनाएर ग्रुम गरेको भए अझै  राम्रो हुन्थ्यो । यो घरेलु मैदानमा खेलको हो । त्यसैले पछिको लागि अझै राम्रो हुन्थ्यो जस्तो लाग्छ ।'

क्यानले आइतबार सितालाई हटाएर इन्दु वर्मालाई उपकप्तान नियुक्त गरेको थियो । गान्डाविरुद्धको टी-ट्वान्टी सिरिज अघि नेपालले इन्दुलाई उपकप्तान चयन गरेको हो ।

नेपालले घरेलु मैदानमा युगान्डाविरुद्ध पाँच खेलको टी-ट्वान्टी सिरिज खेलिरहेको छ । सिरिजमा नेपाल २-० ले पछि रहेको छ ।