मिडल अर्डरको ब्याटिङ चल्न सकेन : कप्तान रुबिना

काठमाडौं । नेपाली राष्ट्रिय महिला क्रिकेट टिमकी कप्तान रुबिना क्षेत्रीले मिडल अर्डरको ब्याटिङ चल्न नसक्दा युगान्डाविरुद्धको खेल गुमाउनु परेको बताएकी छिन् ।

टियु क्रिकेट मैदानमा सोमबार पहिलो टी-ट्वान्टीमा नेपाल युगान्डासँग १२ रनले पराजित भएको थियो ।

ऐतिहासिक खेलमा युगान्डासँग पराजित भएपछि कप्तान रुबिनाले योजना अनुसार खेलेपनि मिडल अर्डरको ब्याटिङ पतन भएको बताईन् ।

'विकेट फ्लाट थियो । हामीले अध्ययन गरे अनुसार उनीहरुको सिम बलर सुरुवातमा राम्रो फाल्ने थियो । हाम्रो रणनिति ६ ओभरमा विकेट नगुमाएर खेल्ने थियो । तर, मिडल ओभर गुम्दा खेल बिग्रियो,' रुबिनाले भनिन् ।

युगान्डाविरुद्धको खेल महिला टोलीका लागि ऐतिहासिक खेल हो।

अन्तराष्ट्रिय क्रिकेटमा पाइला टेकेको १५ वर्षपछि महिला टोलीले पहिलो पटक घरेलु मैदान टियुमा खेलको हो ।    

कप्तान रुबिनाले हारको समिक्षा हुने बताईन् । उनले खेलाडी नर्भस भएको समेत बताईन् ।

'धेरै पछि खेल खेलेको हो । विशेष गरि घरेलु मैदानमा खेलाडीहरु पहिलो पटक खेल्दा उत्साहित भएको हुनसक्छ', उनले भनिन्,, 'पहिलो इनिङमा उत्साह र नर्भस देखिरहेको थियो ।  पक्कै पनि हार राम्रो पाटो हैन । तर, हामी यसको समिक्षा गर्छौं ।'

मुख्य प्रशिक्षक जगत टमटाले फिल्डिङ चुकेको बताए ।

'बलिङ राम्रो गरेको हो । हामी १०/१५ रनले हारेका छौँ । जुन फिल्डिङले गर्दा हो । फिल्डिङमा गल्ति भयो,' मुख्य प्रशिक्षक टमटाले भने ।