काठमाडौं । सातौं संस्करणको नेपाल–पाकिस्तान फ्रेन्डसीप टी–ट्वान्टी क्रिकेट प्रतियोगिताको बुधबार उदघाटन भएको छ ।
पाकिस्तानी राजदूतावासको आयोजनामा सुरु भएको प्रतियोगिताको उदघाटन काठमाडौं महानगरपालिकाका मेयर विद्या सुन्दर शाक्यले गरे ।
मेयर शाक्यले पाकिस्तानी दूतावासले आयोजना गरेको प्रतियोगिताको प्रशंसा गर्दै यस्ता प्रतियोगिताले पाकिस्तान र नेपालका खेलाडीहरुलाई एकजुट बनाउन सहयोग गर्ने बताए ।
नेपालका लागि पाकिस्तानी राजदूत सयद हैदर शाहले कोडिभको यस समयमा खेलकुद गतिविधिको महत्व बढेको बताए ।
शाहले यस प्रतियोगिताले नेपाल र पाकिस्तानबीचको सम्बन्ध अझ सुमधुर बनाउने विश्वास व्यक्त गरे ।
प्रतियोगिता फागुन १८ देखि २६ गतेसम्म संचालन हुनेछ ।
लिगकम नकआउटका आधारमा खेलाइने प्रतियोगितामा १२ टिमको सहभागिता रहनेछ ।
सहभागी १२ टिमलाई चार समूहमा विभाजन गरिएको छ ।
समूह ‘ए’ मा पाकिस्तान दूतावास क्रिकेट क्लब, एचके क्रिकेट क्लब र लायन क्रिकेट क्लब रहेका छन् ।
समूह ‘बी’ मा स्टार क्रिकेट एकेडेमी, बाल पार्क एकेडेमी तथा जीएचसीए रहेका छन् ।
समूह ‘सी’ मा आरएस विद्यापिठ एकेडेमी, एन्जल्स हार्ट एकेडेमी र क्रिकेट एक्सिलेन्स सेन्टर तथा समूह ‘डी’ मा स्कुल अफ क्रिकेट, बालुवाटार क्रिकेट क्लब तथा नेक्सस क्रिकेट एकेडेमी रहेका छन् ।
चारवटै समूहका विजेताहरु सेमिफाइनल प्रवेश गर्नेछन् ।
