सातदोबाटोले खोजेको उडान

काठमाडौं । 'ए' डिभिजनमा उक्लिएका धेरै क्लब टिक्नै सक्दैनन् । शीर्ष डिभिजन खेल्ने अनुभव क्लबसँग हुदैन । क्लबको बजेट शीर्ष डिभिजन उक्लिनमै सक्किएको हुन्छ । क्लबलाई राम्रा खेलाडीले नि पत्याउँदैनन् । औसत टिम र सानो बजेटमा 'ए' डिभिजन टिक्न गाह्रो पर्छ । धेरै क्लब शीर्ष डिभिजनमा उक्लिने बित्तिकै तल झरेको उदाहरण धेरै छन् ।

यस पटक सातदोबाटो युथ क्लब 'ए' डिभिजनमा उक्लिएको छ । स्थापनाको झण्डै २१ वर्षपछि क्लब शीर्ष डिभिजनमा उक्लिएको छ । योसंगै ललितपुर जिल्लामै 'ए' डिभिजन खेल्ने क्लबको संख्या ६ पुगेको छ ।

सातदोबाटोको पहिलो चुनौती भनेकै यस सिजन 'ए' डिभिजनमा टिक्नु हो । 'बी' डिभिजनको बन्न क्लबले धेरै खर्च गर्यो । झण्डै तीन महिनाको अन्तरमा सातदोबाटो 'ए' डिभिजनको तयारीमा जुटेको छ । शीर्ष डिभिजनमा टिक्न ठुलै खर्च चाहिन्छ । सातदोबाटो आर्थिक व्यवस्थापन सहित नयाँ सिजनका लागि टिम निर्माणमा जुटेको छ ।

‘नयाँ क्लबलाई चुनौती छ । 'ए'मा उक्लिएपछि कसरी खेल्ने भनेर सोचेका थियौं । त्यही अनुसार तयारी अघि बढाएका छौं ।’ सातदोबाटोका अध्यक्ष कपिल राना मगरले खेलपाटीसँग भने ।

‘ठुलो चुनौती छ । अवसर पनि छ । त्यसका लागि तयारपनि छौं । यो देखाउने अवसर पनि हो ।’ उनी थप्छन् ।

नयाँ सिजनको लिग असोज ३ गतेबाट सञ्चालन हुँदैछ । कोभिड–१९ का कारण गत वर्ष लिग हुन पाएन । बरु ७७ सालमा प्रभावित बनेको 'बी' डिभिजनका बाँकी खेल सम्पन्न भए । सातदोबाटोले अन्तिम खेलमा आरसिटीलाई हराउँदै च्याम्पियन बन्यो ।

करिब ११ वर्ष 'बी' बाट शीर्ष डिभिजनमा उक्लिन सघर्ष गरेको उसले लिगमा मात्र एक खेल गुमाएको थियो । सातदोबाटोले ११ खेल मध्य ९ मा जित, १ मा बराबरी र १ खेल गुमाएको थियो । गत फागुनमा 'बी' डिभिजन च्याम्पियन बनेको सातदोबाटोले जितको खुसीयालीनै धेरै समय मनाउन पाएन । क्लब नयाँ सिजनको तयारीमा जुट्नुपर्ने बाध्यता थियो ।

‘बी बाट शीर्ष डिभिजनमा पुगेपछि धेरै समय पाएनौं । तीन महिना नबित्दै तयारीमा लाग्नैपर्ने थियो । सबै खर्च 'बी' खेल्दा भयो । फेरी शीर्ष डिभिजनमा उक्लिएपछि आर्थिक व्यवस्थापनका लागि दबाब परेको थियो । तर क्लबका सबैको सहयोगले राम्रो तयारी गर्न पाएका छौं ।’ अध्यक्ष मगरले भने ।

नयाँ सिजन सुरु हुँदै गर्दा सातदोबाटो खेलाडी सरुवा बजारमा आक्रमक तरिकाले प्रस्तुत भएको छ । लिग विजेता विदेशी खेलाडी पिटर सेगुनदेखि मार्टिनलाई अनुबन्ध गरेर सातदोबाटोले सबैलाई ‘चक्मा’ दियो । श्यान्सु भुसाल सहित उमेर समूहको राष्ट्रिय टिमबाट खेलेका युवा खेलाडीको अनुबन्धले सातदोबाटो नयाँ सिजनमा ‘सरप्राइज’ टोलीको रुपमा रहनेछ ।

क्लब व्यवस्थापनको दाबी मान्ने हो भने, केही ठुला नाम अनुबन्धको अन्तिम चरणमा छ । खेलाडी सरुवा बजारमा क्लबले गरेको हस्तक्षपले नयाँ सिजन सातदोबाटोलाई हेर्न लायक टोली बनाएको छ ।

'ए' डिभिजनका सबै क्लब काठमाडौं र ललितपुरका छन् । ललितपुरमा मात्र 'ए' डिभिजन खेल्ने क्लबको संख्या ६ पुगेको छ । थ्री स्टार क्लबदेखि जावलाखेल, फ्रेन्ड्स, च्यासल, बिग्रड ब्वाइजको भिडमा सातदोबाटो समेत जोडिन आइपुगेको छ । शीर्ष डिभिजनमा टिक्नेदेखि ललितपुरले क्लबको भिडमा फरक पहिचान बनाउने चुनौती सातदोबाटोसामु छ ।

त्यसो भए सातदोबाटो के हिसाबले फरक छ त ?

क्लबको संरचना हेर्दा लाग्छ, यो मन मिल्ने मान्छेहरुको गठजोड हो । क्लब ५७ सालमा स्थापना भयो । झण्डै २१ वर्षको समय क्लबले पार गरेको छ । तर, सातदोबाटोमा अझै ८० प्रतिशत पदाधिकारी स्थापनाकालकै छन् । रोचक कुरा, क्लबमा अहिलेसम्म सर्वसम्मत रुपमा नेतृत्व चयन हुदै आएको छ । तेस्रो पटक नेतृत्वमा आएका कपिल सर्वसम्मत रुपमा भर्खरै अध्यक्ष चुनिएका छन् । कपिल यसैलाई क्लबको सबैभन्दा बलियो पक्ष मान्छन् ।

‘अहिलेका ८० प्रतिशत पदाधिकारी स्थापनाकालकै छन् । स्थापनाको २१ वर्षमा क्लबमा भोटिङ भएको छैन । सबै कुरा समझादारीबाटै हुदै आएको छ । लोकतान्त्रिक प्रणाली मान्छौं । तर निर्वाचनको आवश्यकता देखिएको छैन ।’ उनी भन्छन्, ‘क्लबको हितलाई अघि राख्छौं । त्यसपछि अरु कुरा आउँछन् ।’

सातदोबाटो सामाजिक युवा क्लब हो । यसले फुटबलमात्र खेल्दैन, अन्य सामाजिक कृयाकलापमा समेत सहभागी बन्छ । आधुनिक फुटबलको मर्म सामाजिक क्लबले समेट्न नसक्नेबारे बहश घरेलु फुटबलमा जारी छ । तर सामाजिक रुपमा गरिने कृयाकलापले क्लबको ‘गुडविल’ पनि बढ्नेतर्क कपिल गर्छन् ।

‘क्लबको विधानमा सामाजिक कृयाकलापलाई राखेको हुनाले सामाजिक काम धेरै गरेको छ । यसले क्लबको ‘गुडविल’ बढ्दो रहेछ । सामाजिक विकासमा योगदान पुर्याएको हुनाले क्लबले फुटबलमा समेत योगदान गर्न सकेको छ ।’ उनी भन्छन् ।

नेपालका 'ए' डिभिजन क्लबको मुख्य समस्या भनेकै आर्थिक हो । क्लबहरु व्यवसायीक बन्न सकेका छैनन् । स्रोतको अभाव यथावत छ । दिर्घकालिन रुपमा स्रोतको सुनिश्चितता गरि फुटबल खेल्ने क्लब थोरै छन् । सातदोबाटो शीर्ष डिभिजनमा टिक्न मात्र हैन, फैलिन चाहेको छ । फुटबलमा टिक्न र फैलनका लागि चाहिने स्रोतबारे क्लब जानकार देखिन्छ ।

‘फुटबलमा टिक्न स्रोतनै चाहिन्छ । सधै प्रायोजकको भर पर्ने कि स्रोत सुनिश्चित गर्ने भन्ने छलफलमा छौं । घर भाडा र एकेडेमी सञ्चालन गरेर स्रोत जुटाउने योजना बनाइरहेका छौं । कतै लगानी गरेर त्यसको प्रतिफलबाट क्लब सञ्चालनबारे सोचिरहेका छौं ।’ अध्यक्ष कपिल भन्छन् ।

पहिलो पटक 'ए' डिभिजनमा उक्लिएको सातदोबाटो दिर्घकालिन योजना सहित अघि बढ्न खोजेको कपिल बताउँछन् ।

यसपटक राम्रो पोजिसन हासिल गरेर आगामी ५ वर्षमा लिग जित्ने लक्ष्य सहित क्लब अघि बढिरहेको उनी सुनाउँछन् । सातदोबाटोले एकेडेमी संचालनका लागि लिटल एन्जल्स स्कुलसँग सम्झौता समेत गरिसकेको छ ।

‘नयाँ क्लब हो । चुनौती छ । तर हाम्रो टिम राम्रो छ । क्लबमा एकता छ ।’ कपिल भन्छन्, ‘टिक्ने मात्र हैन । एकपछि अर्को गरेर आगामी ५ वर्षमा लिग जित्ने लक्ष्य राखेका छौं ।’

'बी'बाट 'ए' डिभिजनमा गएको प्राय क्लब तल झर्ने गरेका छन् । सातदोबाटो योजना सहित फुटबलमा आएको दाबी गर्छ । गृहकार्य हेर्दा फुटबलमा सातदोबाटो ‘सिरियस’ देखिन्छ । योजना दिर्घकालिन बनाएको छ । तर यो सबै नयाँ सिजनको लिगमा क्लबले हासिल गर्ने नतिजामा भर पर्नेछ ।