काठमाडौं । घरेलु मैदान । खचाखच दर्शक । ओपनिङ जोडीको आक्रामक ब्याटिङ । शानदार जित ।
एक, नेपाली क्रिकेट समर्थक यसमा विरलै रमाउन पाउँछन् । तर शनिबारको दिन यो माहोल टियु क्रिकेट मैदानको रौनक थियो ।
प्राय 'डिफेन्सिभ’ शैलीमा देखिने नेपाल शनिबार 'अट्याकिङ मुड’ मा थियो । नेदरल्यान्ड्सका कप्तान पिटर सिलारको भाषामा भन्ने हो भने नेपाल शनिबार फरक 'एटीट्यूड’मा थियो ।
नेपाल क्रिकेट संघ (क्यान) ले आयोजना गरेको त्रिकोणात्मक टी-ट्वान्टी सिरिजको उद्दघाटन खेलबाट १३ महिनापछि नेपाल अन्तराष्ट्रिय क्रिकेटमा फर्कियो, शानदार तरिकाले ।
प्रतियोगिताको उद्दघाटन खेलमा पाहुना टोली नेदरल्यान्ड्समाथि ९ विकेटको फराकिलो जित निकाल्दै घरेलु टोली नेपालले सुखद सुरुवात गर्यो ।
१ सय ३७ रनको सामान्य लक्ष्य पछ्याएको नेपालले १४ ओभरमा मात्र १ विकेट गुमाएर लक्ष्य भेट्टायो । नेपालको सहज जितमा सलामी जोडीले आक्रामक अर्धशतकीय इनिङ्स खेले । खेलमा नेपालको ओपनर जोडीले पहिलो पटक राष्ट्रिय टोलीबाट डेब्यु गरेका थिए । कुशल भुर्तेल र आशिफ शेख । दुबै खेलाडीले शानदार डेब्यु गर्दै नेपाललाई जित दिलाए ।
जित दिलाउन कुशलले ६२ रनको आक्रमक इनिङ खेले । ४६ बल खेलेका उनले ५ चौका र ५ छक्का प्रहार गरे । कुशल सुरुवात देखिनै आक्रमक देखिए । तीव्र गतिमा रन बनाउनु अघि भुर्तेल पहिलो ओभरको तेस्रो बलमा शुन्य रन बनाउँदा क्याच भएका थिए । तर अम्पायरले नो बलको इसारा गरेपछि भुर्तेलले जीवनदान पाए । क्याचसंगै मैदान छाडिसकेका उनलाई नन् स्ट्राइकर इण्डमा रहेका अफिसले नोबल हो भन्दै रोकेपछि हतारमा क्रिजभित्र पसे ।
लगत्तै पाएको फ्रि हिटमा भुर्तेलले चौका प्रहार गरे । त्यसपछि भने रोकिएनन् । शर्ट कभरमा क्याच आउट हुनुअघि १३ औं ओभरमा पहिलो विकेटको लागि भुर्तेलले १ सय १६ रनको साझेदारी गर्दै नेपाललाई जितको आधार तयार पारेका थिए ।
अर्का ओपनर आशिफले ३८ बलमा ४ चौका र ४ छक्का प्रहार गर्दै अर्धशतक बनाए । उनी ५४ रनमा अविजित रहे । कप्तान ज्ञानेन्द्र मल्लले ७ बलमा १३ रनको योगदान गरे ।
टस जितेर पहिले फिल्डिङ गरेको नेपालले पाहुना टोलीलाई खुलेर खेल्ने मौका दिएन । चुस्त बलिङ गरेको नेपालले सुरुवात देखिनै नेदरल्यान्ड्सलाई दबाबमा राखेको थियो । नेपाललाई लेग स्पिनर सन्दीप लामिछानेले दोस्रो ओभरमा पहिलो सफलता दिलाए । उनले म्याक ओडोवडलाई १० रनमा एलबीडब्लु आउट गरे ।
लगत्तै अर्को ओभरमा सोमपाल कामीले बेन कुपरलाई शुन्यमा एलबीडब्लु धरापमा पारेपछि नेदरल्यान्ड्सको ब्याटिङ धर्मराएको थियो ।
नेदरल्यान्ड्सका बास डी लिडले सर्वाधिक ४१ रन बनाए । उनले ४९ बल खेलेर ३ चौका र २ छक्का प्रहार गरे । स्कट इडवार्डसले ३० तथा कप्तान पिटर सिलार २२ र एन्टोनिउस स्टलले अविजित रहँदै २० रन बनाए ।
नेपालका लागि सन्दीपले २ विकेट लिए । यस्तै, सोमपाल र डेब्यु खेलाडी शाहाब आलमको नाममा १–१ विकेट रह्यो ।
नेपालले शनिबार देखाएको खेल निकै दुर्लभ थियो । यस्तो प्रदर्शन नेपाली खेलाडीबाट विरलै देख्न पाइन्छ । पाहुना टोली नेदरल्यान्ड्सका कप्तानले समेत नेपालको खेलको खुलेर प्रशंसा गरे ।
नेदरल्यान्ड्सका कप्तान पिटर सिलारले शनिबारको खेलमा नेपालले पहिलेको भन्दा फरक मनोवृत्ति देखाएको बताए ।
'नेपालको खेल फरक थियो । सधैं खेल्ने एटिटिउड भन्दा फरक थियो । इमान्दार हुनु पर्दा, हामी भन्दा सय गुणा राम्रो थियो नेपालले । हामीलाई नेपालले राम्रो पाठ सिकाएको छ ।’ नेदरल्यान्ड्सका कप्तान पिटरले भने ।
यस्तै, नेपाली कप्तान ज्ञानेन्द्र मल्ल समेत शनिबारको खेल उत्कृष्ट मध्यको एक रहेको बताउँछन् ।
'समग्रमा शनिबारको खेल हामीले वान अफ द बेस्ट क्रिकेट खेलेको जस्तो लाग्छ । तर सुरुवातमा तालमेल नमिलेको जस्तो भएको थियो । त्यसैले मिस फिल्ड धेरै भइरहेको थियो । तर बलरहरुले कमब्याक गर्दै उनीहरु (नेदरल्यान्ड्स)लाई १ सय ४० भित्र रोक्न सफल भयौं ।’ खेलपछि कप्तान ज्ञानेन्द्रले भने, ’यो लक्ष्य भेट्टाउने कुनै दुई खेलाडीले हात उठाउनु पर्ने थियो । डेब्यु दुई ओपनर खेलाडीले यस खेललाई जसरी अगाडी लगे, यो एक वान अफ द बेष्ट थियो ।’
लामो समय देखि नेपालले ओपनिङ जोडीको लागि थुप्रै परिक्षण गर्दै आएको छ । चाहे एकदिवसीय होस् या टी ट्वान्टी । नेपालले पर्फेक्ट ओपनर जोडी पाउन सकेको छैन । यसबीचमा थुप्रै खेलाडीले ओपनिङमा प्रयास गरे तर नेपालले दिर्घकालिन ओपनर जोडी पाउन सकेको छैन । तर डेब्यु गरेका यी ओपनरले केही आस गर्ने बाटो देखाएका छन्, केहि संकेत गरेका छन् । कुशल र आशिफले गरेको यो ओपनिङ साझेदारी नेपालले टी-ट्वान्टीमा गरेको कीर्तिमानी साझेदारी हो । उनीहरुले पहिलो विकेटको लागि १ सय १६ रनको साझेदारी गरेका थिए ।
कप्तान ज्ञानेन्द्रले समेत आशिफ र कुशलको प्रर्दशनबाट प्रेरित भएको बताउँछन् । तर दुई खेलाडीले ओपनिङ गर्ने भनेर लामो समय देखिको नरहेको प्रष्ट पारे ।
'युवा खेलाडीहरु राष्ट्रिय टिममा आएर एक्स्पोज हुने मात्र हैन प्रदर्शन गरेर खेल जिताउन सक्छन् भन्ने प्रमाण उनीहरुले गरेका छन् । उनीहरुको लागि खुसी छु ।’ ज्ञानेन्द्रले थपे, 'पारस टिममा हुँदा भने ओपनिङ उनीहरुले गर्ने केहि पक्का थिएन । यद्दपी उनीहरुले ओपनिङको लागि योग्य छन् भन्ने लागेको थियो । तर पारस घाइते भएपछी भूमिका परिवर्तन गर्यौं र दुई जनालाई ओपनिङ गर्ने मौका दियौं र त्यो सफल सावित भयो जस्तो लाग्छ ।’
'हामीले डोमिनेन्ट गर्न सक्छौं । उनीहरुले क्लब क्रिकेटदेखि नै विशिष्ट स्थान ओपनिङमा पाउँदै आएका थिए । नयाँ खेलाडीहरुलाई स्थान परिवर्तन गर्दै आउँदा गाह्रो पर्छ । तर उनीहरु एक डेढ वर्षदेखि ओपनिङ मात्र गर्दै आएका छन् । उनीहरु खेल्दा खेल्नका लागि मात्र होइन, त्यो स्थानमा उनीहरु योग्य भएर खेलेको थिए ।’ ज्ञानेन्द्रले थपे ।
नेपालले टी-ट्वान्टीमा ९ विकेटले विजयी भएको यो तेस्रो पटक हो । यसअघि नेपालले थाइल्याण्ड र सिंगापुरलाई ९ विकेटले पराजित गरेको थियो । सहज जित हातपारे पनि नेदरल्यान्ड्स कमजोर टोली नरहेको ज्ञानेन्द्रले बताए ।
'नेदरल्यान्ड्सको खेलाडीहरु धेरै परिवर्तन थियो । पूर्ण टोली नभएपनि उनीहरु अलि बलियो भएर आउँछ भन्ने आश गरेका थियौं । यो भन्दा राम्रो टिम हुन्थ्यो होला । तर लामो समयपछि क्रिकेट खेलेको भएर हुनसक्छ ।’ उनले भने, 'विगत १५–२० वर्षदेखि उनीहरु एकदिवसीय अन्तराष्ट्रिय मान्यता पाउँदै र विश्वकपमा सहभागी हुँदै आएको छ । उनीहरुसंग सिस्टम छ तर यो माहामारीपछि यो कन्डिसन, युवा खेलाडी, समर्थकहरुको कारण उनीहरुले संघर्ष गरेको होला । तर उनीहरु कमजोर भने होइन ।’
पराजित कप्तान पिटर नेपाली समर्थक सामु केहि नलागेको बताए । खराब खेल समर्थकलाई पस्किएको कारण उनले यसो भनेका हुन् ।
'हल्याण्डमा हामीले यस्तो समर्थक पाउँदैनौं, यी समर्थक निकै प्यासनेट थिए । यिनीहरूलाई हामीले चुप गराउन पाएको भए हुन्थ्यो तर आज उनीहरु रोकिनु परेन । नेपाली समर्थकको बारे सुनेका थियौं, शनिबार महशुस गरियो ।’ नेदरल्यान्ड्सका कप्तान पिटरले आफुहरुले भन्दा सय गुणा राम्रो खेलेको बताउँदै भने, 'दर्शकसामु अलि लाज पनि लाग्यो, हामीले स्तरीय क्रिकेट देखाउन पाएनौं । समर्थकलाई खराब खेल पस्कियौँ । उनीहरूले नेपालको खेलको मात्र मज्जा लिए ।’
उनले शनिबारको खेलमा नेपालले आफुहरुलाई ठुलो पाठ सिकाएको बताए । यस पाठले आउने खेलमा सहयोग पुग्ने उनले बताए ।
'मलेसियासँग हामीले खेलका छैनौ। झण्डै २५ वर्ष जति भयो होला । तर आजको खेलबाट पाठ लिएका छौ । र पिचबारे समेत जान्ने मौका पायौं। हामीलाई आज थाहा भयो, पिचले कस्तो व्यवहार गर्छ । मलेसियासँग खेलका लागि आतुर छु । अब मलेसिया गलत दिशामा हुनेछ ।’
-1737115819.jpeg)
