पोखरा । स्याङ्जा जिल्ला भलिबल संघ पोखरामा जारी मुख्यमन्त्री कप गण्डकी प्रदेशस्तरीय भलिबल प्रतियोगिताको पुरुषतर्फ क्वाटरफाइनलमा प्रवेश गरेको छ ।
पोखरा रंगशालामा मंगलबार आयोजक कास्कीलाई २-० को सेटमा पराजित गर्दै स्याङ्जा क्वाटरफाइनलमा प्रवेश गरेको हो ।
समूह 'ए' मा रहेको स्याङ्जाले कास्कीलाई २५-१९ र २५-१८ ले हराएको हो ।
जितसँगै स्याङ्जाले ३ अंक जोड्यो । स्याङ्जा समूह विजेता बन्यो ।
यस समूहबाट कास्की पनि क्वाटरफाइनलमा पुगेको छ ।
यस समूहमा दुई टिम रहेको कारण दुबै टिम क्वाटरफाइनलमा पुगेका हुन् ।
पुरुषतर्फको अर्को खेलमा तनहुँले मुस्ताङलाई २-० को सेटमा हराएको छ ।
तनहुँले मुस्ताङलाई २५-१७ र २५-९ ले पराजित गरेको हो ।
जितसँगै समूह 'बी' को तनहुँले ३ अंक जोडेको छ । यस समूहबाट क्वाटरफाइनलमा पुग्ने टोलीको तय बुधबार हुनेछ ।
पुरुषतर्फको दुई खेल भने वर्षाको कारण स्थगित भएको छ । स्थगित खेल बुधबार हुने आयोजकले जनाएको छ ।
महिलातर्फ म्याग्दी र पर्वत क्वाटरफाइनलमा प्रवेश गरेका छन् ।
म्याग्दीले २-० को सोझो सेटमा नवलपुरलाई पराजित गर्दै क्वाटरफाइनलमा स्थान बनाएको हो ।
म्याग्दीले नवलपुरमाथि २५-५ र २५-१५ को सेटमा हराएको हो । जितसँगै समूह 'ए' को म्याग्दीले ३ अंक जोडेको छ ।
म्याग्दी समूह विजेता बनेर क्वाटरफाइनलमा पुगेको हो । नवलपुर पनि समूह उपविजेता बनेर क्वाटरफाइनलमा पुगेको छ ।
यस समूहमा दुई टिम रहेको कारण दुबै टिम क्वाटरफाइनलमा पुगेका हुन् ।
यस्तै दोस्रो खेलमा पर्वतले स्याङ्जालाई २५-१४ र २५-६ को सोझो सेटमा पराजित गर्यो । जितपछि समूह 'सी' को पर्वतले ३ अंक जोडेको छ ।
पर्वत समूह विजेता बनेर क्वाटरफाइनलमा पुगेको छ । यस समूहमा पनि २ टिम रहेको कारण स्याङ्जा पनि क्वाटरफाइनलमा पुगेको छ ।
महिलातर्फको अर्को खेलमा तनहुँ जिल्लाले लमजुङलाई २–० को सोझो सेटमा पराजित गर्दै प्रतियोगितामा सुखद सुरुवात गरेको छ ।
तनहुँले लमजुङमाथि २५-१४ र २५-६ को सेटमा जित निकाल्यो । जितसँगै समूह 'बी' को तनहुँले ३ अंक जोड्यो ।
यस समूहबाट क्वाटरफाइनलमा पुग्ने टोलीको तय बुधबार हुनेछ ।
प्रतियोगितामा पुरुषतर्फ १० जिल्ला र महिलातर्फ ९ जिल्लाको सहभागिता रहेको छ ।
पाँच दिन चल्ने प्रतियोगिताको विजेता महिला र पुरुष टोलीले समान २–२ लाख र ट्रफी पुरस्कार प्राप्त गर्नेछन् भने उपविजेताले १–१ लाख पुरस्कार प्राप्त गर्ने आयोजकले जनाएको छ ।
तेस्रो हुने टोलीले समान ५० हजार प्राप्त गर्ने छन् ।
प्रतियोगिताको सर्वोकृष्ट खेलाडी, उत्कृष्ट सेटर, डिफेण्डर, स्पाइकर र लिफ्टरले ५–५ हजार पाउने छन् ।
