काठमाडौं । चौंथो संस्करणको प्रधानमन्त्री कप (पीएम कप) राष्ट्रिय क्रिकेट प्रतियोगिताको उपाधि त्रिभुवन आर्मी क्लबले हात पार्यो ।
टियु क्रिकेट मैदानमा शनिबार भएको फाइनल खेलमा विभागीय टिम एपीएफलाई ३३ रनले पराजित गर्दै आर्मी च्याम्पियन बन्न सफल भयो ।
आर्मीले पहिलो संस्करणमा नेपाल पुलिस क्लबसँग उपाधि बाडेको थियो । त्यसपछिको दुई संस्करणमा आर्मी फाइनलमा चुकेको थियो ।
यस पटक भने आर्मीले गल्ति दोहोर्याएन् र उपाधि आफ्नो पोल्टामा पार्यो ।
उपाधि उचालेपछि आर्मीका कप्तान विनोद भण्डारीले प्रतियोगिताहरु आयोजना हुदाँ नयाँ खेलाडी आउने उल्लेख गरे । धेरै प्रतियोगिताहरु आयोजना हुँदा नयाँ खेलाडीको पहिचान हुने उनको भनाई थियो ।
आर्मीका कप्तान विनोदले भने जस्तै चौंथो संस्करणको प्रतियोगिताले पनि केहि प्रतिभावान खेलाडी जन्माएको छ । यस्तै थुप्रै खेलाडीले क्रिकेट जगतको ध्यान खिच्न सफल भएका छन् ।
पीएम कपमा सबैको ध्यान खिच्न सफल ६ खेलाडीको वर्णन तल गरिएको छ ।
१. विवेक यादव
विवेक यादव प्रतियोगिताकै उदयमान (इमर्जिङ) खेलाडी घोषित भए ।
अलराउण्ड प्रदर्शन गर्न सक्ने विवेक प्रतियोगितामा प्रदेश-२ बाट सर्वाधिक रन बनाउने खेलाडी हुन् ।
४ खेलमा ब्याटिङ गरेका विवेकले १ सय ६७ रन बनाएका थिए । सुरुवाती २ खेलमा अर्धशतक बनाएका विवेक तेस्रो खेलमा अर्धशतक बनाउन ९ रनले चुकेका थिए ।
नेपाल पुलिस क्लबविरुद्धको खेल बाहेक उनको ब्याटबाट आकर्षक रन निस्किएको थियो ।
यस्तै उनले प्रतियोगिताको ३ खेलमा बलिङ गर्दै ४ विकेट समेत लिए ।
विवेक नेपाली यू-१९ टिममा समेत परिसकेका खेलाडी हुन् । बलको लाइन र लेन्थ छिटो बुझ्न सक्ने र लामो सट प्रहार गर्न सक्ने विवेकको बलियो पक्ष हो ।
उनी यस प्रतियोगितामा सर्वाधिक छक्का प्रहार गर्ने दोस्रो खेलाडी समेत हुन् । विवेकले यस प्रतियोगितामा १० छक्का र ८ चौका प्रहार गरेका छन् ।
५ खेल खेलेका राष्ट्रिय टिमका खेलाडी आरिफ शेख भन्दा उनले ३ छक्का कम प्रहार गरेका हुन् । यस्तै उनले स्पिन तथा फास्ट बलरलाई खुलेर खेल्न सक्ने क्षमता राख्दछन् । प्रतियोगितामा उनको औषत ६६ को रहेको छ ।
लोभ लाग्दो प्रदर्शनको कारण विवेक नेपाली टोलीको बन्द प्रशिक्षणमा समेत परेका छन् । आगामी फेब्रुअरीमा कतार भ्रमणमा जाने १८ सदस्सीय नेपाली राष्ट्रिय टोलीको लागि बन्द प्रशिक्षणमा उनलाई सामेल गरिएको छ ।
२. अनुज चुनरा
युवा फास्ट बलर अनुज चुनराले आफ्नो गति र बल स्विङ गराउन सक्ने क्षमताको कारण प्रतियोगितामा सबैको ध्यान खिच्न सफल भए ।
कर्णाली प्रदेशका युवा बलरले ४ खेलमा ८ विकेट लिन पनि सफल भए । चुनरा यस प्रतियोगितामा सर्वाधिक विकेट लिने ८ औं स्थानमा रहन सफल भए । यस्तै आफ्नो प्रदेशको लागि रबिन्द्र जङ शाहीसंगै उनले सर्वाधिक विकेट लिए ।
चुनरा नयाँ बलले फराकिलो स्विङ गराउन सक्ने क्षमता राख्दछन् । ब्याट्सम्यानबाट भित्र (इन स्विङ) तथा बाहिर लाने (आउट स्विङ) गराउन सक्ने बलर हुन् ।
उनले पुरानो बलमा ब्याट्सम्यानलाई आफ्नो तिब्र गतिले बिट गराउन सक्छन् । यस प्रतियोगितामा चुनरा टप अर्डरका ब्याट्सम्यानका लागि घातक बलरको रुपमा देखिए ।
उनले शरद भेषवाकर, रित गौतम, रोहित पौडेल, दिपेश खत्री जस्ता ब्याट्सम्यानलाई सस्तैमा पेभिलियनको बाटो देखाएका थिए ।
यस प्रतियोगितामा उनको इकोनोमी ४ दशमलब ३९ को रहेको थियो । झन्डै ३० ओभर बलिङ गरेका उनले ६ ओभर मेडेन ओभर राखेका थिए ।
स्पिन बलरको वर्चश्व रहँदै आएको नेपालमा चुनराले फास्ट बलिङबाट सम्भावना बोकेको खेलाडीको रुपमा परिचित गरे ।
३. अर्जुन कुमाल
१६ वर्षे युवा ब्याट्सम्यान अर्जुन कुमाल यस प्रतियोगिताले पाएको एक ठुलो नाम हो । कलिलै उमेरमा अर्जुनले देखाएको क्रिकेटिङ सट कुनै राष्ट्रिय टिमको ब्याट्सम्यानको भन्दा कम थिएन ।
यू-१६ राष्ट्रिय क्रिकेट टिमबाट प्रदर्शन गरिसकेका अर्जुनले आफ्नो पहिलो राष्ट्रिय प्रतियोगितामा राम्रो छाप छाड्न सफल भए ।
भारतमा क्रिकेट सिक्दै आएका अर्जुनको सट सेलेक्सन र टाइमिङ उत्कृष्ट थियो । ओपनर अर्जुन आफ्नो प्रदेश (गण्डकी प्रदेश) को सर्वाधिक रन बनाउने खेलाडी हुन् ।
उनले ४ खेलमा १ सय १७ रन जोड्न सफल भए । कर्णाली प्रदेशविरुद्ध उनले बनाएको ४६ रन उनको सर्वाधिक स्कोर हो । अर्धशतक पुरा गर्न ४ रनले पछि रहेको अवस्थामा उनी किपरको हातबाट क्याच आउट हुन् पुगेका थिए । अर्जुनले प्रतियोगितामा झन्डै ३० को औषतमा १७ चौका प्रहार गरेका थिए ।
४. देव खनाल
यस प्रतियोगिताले जन्मेको अर्को नयाँ नाम हो देव खनाल । लुम्बिनी प्रदेशका यी खेलाडीले प्रतियोगितामा आफ्नो कलात्मक सट र टाइमिङले सबैलाई प्रभावित पारे ।
देवले ३ खेलमा १४ चौका प्रहार गर्दै ८४ रन बनाए । पहिलो खेलमा उपाधि दाबेदार नेपाल पुलिस क्लबविरुद्ध ठुलो लक्ष्य पछ्याउने क्रममा उनले ४९ रनको इनिङ्स खेलेका थिए ।
अर्धशतकबाट मात्र १ एक रनले पछि रहेको अवस्थामा उनलाई पवन सर्राफले कुशल भुर्तेलको हातबाट क्याच आउट गराएका थिए । त्यस खेलमा खराब सुरुवात गरेको लुम्बिनी प्रदेशको लागि देवले इनिङ्स उकास्ने काम गरेका थिए ।
सातौँ ओभरमा १६ रन जोड्दा २ विकेट गुमाएको लुम्बिनीको लागि देवले सौरभ खनालसनाग २६ औं ओभरसम्म ६६ रनको साझेदारी गरेका थिए ।
यस्तै उनले सुदूरपश्चिम प्रदेशविरुद्ध ९ रन जोड्दा उपाधि दाबेदार मानिएको बागमती प्रदेशविरुद्ध २६ रन बनाएका थिए । देवले प्रतियोगितामा ८० को स्ट्राइक रेटमा १४ चौका प्रहार गरेका छन् ।
५. विपिन रावल
कर्णाली प्रदेशका विपिन रावलको ब्याट यस प्रतियोगितामा चल्यो । ४ खेल खेलेका उनले १ सय १० रन जोड्न सफल भए ।
प्रतियोगितामा उनको स्ट्राइक रेट लोभलाग्दो रह्यो । प्रतियोगितामा मात्र ९४ बलको सामना गरेका उनको १ सय १७ दशमलव ३ को स्ट्राइक रेट रहेको छ ।
विकेटकिपर विपिन ओपनिङ ब्यटिङ गर्न आउने गर्छन् । तर, उनले केही बलको सामना गर्दैमा पिच र मैदानको स्वभाव बुझ्छन् । उनी अन्य ब्याट्सम्यान जस्तो सेट हुन लामो समय लिदैनन् ।
प्रतियोगितामा उनले गण्डकी प्रदेशविरुद्ध सर्वाधिक ४९ रन बनाए । ३ छक्का र ४ चौका प्रहार गर्दै अर्धशतकबाट मात्र १ रनले चुकेका उनलाई विपिन खत्रीले बोल्ड गरे ।
दोसो खेलमा प्रदेश १ विरुद्ध ४७ रन बनाएर पेभिलियन फर्किदा विपिन पुन: अर्धशतकबाट चुकेका थिए ।
६. गौतम केसी
मात्र ३ खेल खेलेका गौतम केसी सर्वाधिक विकेट लिने खेलाडीको सूचीको तेस्रो स्थानमा रहेका छन् ।
चितवनका गौतमले बागमती प्रदेशबाट खेल्दै उत्कृष्ट बलिङ गर्दै सबैको ध्यान खिच्न सफल भए ।
केसीले च्याम्पियन बनेको आर्मीविरुद्ध सेमिफाइनल खेलमा ५ विकेट लिएका थिए । यद्दपी उनको टोली पराजित भएको थियो ।
केसीले पहिलो खेल प्रदेश १ विरुद्ध ४ विकेट लिएका थिए । प्रतियोगिता भर ३० ओभर बलिङ गर्दै ३ मेडेनका साथ उनले ११ विकेट आफ्नो नाममा बनाए ।
केसी भन्दा अघि रहेका आर्मीका शाहब आलम ५ खेलमा १२ तथा अविनास बोहरा ५ खेलमा १४ विकेट लिएका छन् ।
