माघ ७ मा महिला लिग !

काठमाडौं । अखिल नेपाल फुटबल संघ (एन्फा)ले माघकाे दोस्रो साताबाट महिला लिग सुरु गर्ने भएको छ ।

बिहीबार बसेकाे कार्य समिति बैठकबाट पारित वार्षिक कार्यक्रम अनुसार एन्फाले महिला लिग माघ ७ बाट संचालन गर्ने तयारी गरेको हो ।

एन्फा महिला विभाग प्रमुख हरि खड्काले माघ दोस्रो साताबाट महिला लिग संचालनमा आउने खेलपाटीलाई जानकारी गराए ।

‘माघ पहिलो साता या दोस्रो साताबाट सुरु हुने गरि तयारी गरिरहेको छौं । अहिलेको योजना अनुसार अघि बढ्यौं भने ७ गते सुरु गर्छौं ।’  महिला विभाग प्रमुख समेत रहेका खड्काले भने ।

यसअघिनै जिल्ला छनोट तथा नगर छनोटसँगै ४ टोली तयार गरेको एन्फाले फाइनल चरणमा विभागीय ३ टोली सहित ७ टोलीलाई महिला लिगमा प्रतिस्पर्धा गराउन लागेको छ ।

यसअघि रुपन्देहीमा भएको छनोट प्रतियोगिताबाट आयोजक चन्द्रपुर नगरपालिका, चौदण्डीगढी नगरपालिका, वालिङ नगरपालिका र विराटनगरपालिका प्रतियोगिताको लागि छनोट भएका थिए ।

महिला विभाग र एन्फाले गत बैशाखमा प्रतियोगिता संचालनमा ल्याउने तयारी गरेपनि कोरोना महामारिपछि प्रतियाेगिता स्थगित भएकाे थियाे ।

एन्फाले हाल मौखिक रुपमा प्रतियोगितामा सहभागी ४ टिमलाई तयारीका लागि बताएपनि केही दिनमा पत्राचार गर्ने बताएकाे छ ।

सरकारले खेलकुद क्षेत्रको प्रशिक्षण सुरु गर्न स्विकृती प्रदान गरेसँगै विभागीय तीन टिम (आर्मी, पुलिस र एपीएफ) ले प्रशिक्षण सुरु गरिसकेका छन् ।

‘हामीले मौखिक रुपमा सहभागी टोलीलाई जानकारी गराईसकेका छौं । पत्र मात्रै पठाउन बाँकी छ ।’ खड्काले भने ।

एन्फाको बिहीबार बसेको कार्यसमितीको बैठकले यसअघि मासिक ७ हजार तलब पाउँदै आएका महिला खेलाडीकाे तलब वृद्धि गर्दै पुरुष सरह १८ हजार दिने निर्णय गरेको छ ।

यस्तै, एन्फाले काठमाडौंमा माघ ६ गते साधारण सभा गर्ने निर्णय गरेको छ । साधारण सभा भोलि पल्टै एन्फाले महिला लिग सुरु गर्ने तयारी गरेको हो ।

गत मसिंरमा नेपालमा आयोजना भएको १३ औं दक्षिण एसियाली खेलकुद प्रतियोगिता (साग) र सेनाले आयोजना गरेको प्रधानसेनापति कप यता सिनियर महिला खेलाडी प्रतियोगिता विहिन रहँदै आएका थिए ।

एन्फाको वार्षिक कार्यक्रम अनुसार कोरोना महामारिपछि नेपालमा सुरु हुने फुटबल प्रतियोगिता महिला लिग पहिलो प्रतियोगिता हुनेछ । एन्फाले कोभिडकाे प्रभाव हेरेर दर्शक सहितकाे महिला लिगकाे याेजना बनाएकाे छ । 

‘मैदानमा दर्शक प्रवेशका लागि पनि तयारी गरिरहको छौं । कोरोना स्वास्थ्य मापदण्ड अपनाउँदै दर्शकलाई प्रवेश गराउने योजना छ ।’ खड्का भन्छन् ।

यसअघि मोफसलमा लिग खेलाउने तयारी गरेको एन्फाले कोरोनाकै कारण प्रतियोगिता उपत्यका बाहिर नलैजाने भएकाे छ ।