लेविनको ह्याट्रिकमा एभर्टनको दाेस्राे जित

एजेन्सी । इंग्लिस प्रिमियर लिग फुटबलमा एभर्टनले लगातार दोस्रो जित निकालेको छ ।

शनिबार भएको खेलमा वेस्ट ब्रुमलाई ५-२ गोल अन्तरले पराजित गर्दै एभर्टनले लगातार दोस्रो जित निकालेको हो ।

घरेलु मैदानमा एभर्टनलाई जित दिलाउन डोमिनिक कल्भार्ट लेविनले ह्याट्रिक गरे । यस्तै जेम्स रोड्रिगेज र माइकल किनले एक एक गोल गरे ।

१० खेलाडीमा सिमित वेस्ट ब्रुमका ग्राडी डियानगाना र माथ्युस पेरिएराले एक एक गोल फर्काए ।

गोडिसन पार्कमा सुरुवाती अग्रता भने वेस्ट ब्रुमले बनाएको थियो । खेलको दशौँ मिनेटमा ग्राडीले गोल गर्दै वेस्ट ब्रुमलाई अग्रता दिलाएका थिए ।

तर, ३२ औं मिनेटमा लेविनले गोल गर्दै एभर्टनलाई १-१ गोलको बराबरीमा ल्याए । ४५ औं मिनेटमा रोड्रिगेजले डेब्यु गोल गरेपछि पहिलो हाफमा एभर्टन २-१ ले अघि रह्यो ।

पहिलो हाफको अन्तिम समयमा किएरन गिब्सले रातो कार्ड पाएपछि वेस्ट ब्रुम १० खेलाडीमा समेटिएको थियो ।

४७ औं मिनेटमा पेरिएराले गोल गर्दै वेस्ट ब्रुमलाई २-२ को बराबरीमा ल्याए । ५४ औं मिनेटमा माइकलले गोल गर्दै एभर्टनलाई पुन ३-२ को अग्रता दिलाए ।

खेलको ६२ औं मिनेटमा लेविनले व्यक्तिगत दोस्रो गोल गर्दा एभर्टन ४-२ ले अघि रह्यो ।

त्यसपछि खेलको ६६ औं मिनेटमा लेविनले तेस्रो तथा ह्याट्रिक पुरा गर्दै एभर्टनलाई ५-२ को जित दिलाए ।

लेविन यस सिजनको लिगमा ह्याट्रिक गर्ने दोस्रो खेलाडी हुन् ।

जितसँगै एभर्टनले २ खेलमा ६ अंक जोडेको छ । एभर्टन तालिकाको शीर्ष स्थानमा उक्लिएको छ ।

पहिलो खेलमा एभर्टनले टोटेनहमलाई १-० ले हराएको थियो ।

वेस्ट ब्रुमको यो लगातार दोस्रो हार हो । पहिलो खेलमा वेस्ट ब्रुम लेष्टर सिटीसँग ३-० ले पराजित भएको थियो ।