काठमाडौं । राष्ट्रिय खेलकुद परिषद् (राखेप) को बोर्ड सदस्यमा मनोनित भएका गोविन्द्र भट्टराईलाई विश्व बैंकको दक्षिण एसियाली क्षेत्रको उपाध्यक्ष हार्टविग सेफरले बधाई दिएका छन् ।
उपाध्यक्ष सेफरले नेपाल अटोमोवाइल्स एसोसिएसन (नासा) लाई एक पत्र लेख्दै भट्टराईलाई बधाई तथा शुभकामना दिएका हुन् । भट्टराई नासाका पूर्व महासचिव हुन् ।
'राष्ट्रिय खेलकुद परिषद् (राखेप) को सदस्यमा नियुक्त हुनुभएको बधाई दिन चाहन्छु,' पत्रमा सेफरले भनेका छन्, 'नेपालका खेलाडीहरुको सडक सुरक्षाका लागि कदम चालेको हेर्न चाहन्छु ।'
पर्वतीय खेलकुद महासंघका अध्यक्ष समेत रहेका भट्टराईलाई युवा तथा खेलकुद मन्त्री जगतबहादुर विश्वकर्माले बोर्ड सदस्यमा मनोनित गरेका थिए ।
परम्परागत, साहसिक तथा पर्यटकीय खेल क्षेत्रको प्रतिनिधिको रुपमा भट्टराईलाई राखेपको बोर्ड सदस्यमा मनोनयन गरिएको हो ।
भट्टराईलाई फेडेरेसन इन्टरनेसनल डी अटोमोबाइल्सका अध्यक्ष जिन टोद्टले पनि बधाई तथा शुभकामना दिएको छ ।
यस्तै विश्व रोड ट्रान्सपोर्ट अर्गनाइजेसनले समेत भट्टराईलाई बधाई सन्देश पठाएको छ ।
-1736575369.jpg)
