काठमाडौं । नेपाल खेलकुद पत्रकार मञ्च (एनएसजेएफ) गण्डकीले खेलकुद पत्रकार प्रकाश तिमल्सिनामाथि भएको दुर्व्यवहारको भर्त्सना गरेको छ ।
एनएसजेएफ गण्डकीले शनिबार एक विज्ञप्ति निकाल्दै तिमल्सिनामाथि भएको दुर्व्यवहारको घोर भर्त्सना गरेको हो ।
हाम्रो खेलकुद डटकमका सम्पादक समेत रहेका तिमल्सिनामाथि बिहीबार अखिल नेपाल फुटबल संघ (एन्फा) का पूर्व अध्यक्ष गणेश थापा र उनका छोरा अभिषेक थापाले दुर्व्यवहार गरेका थिए ।
तिमल्सिनालाई समाचारकाे लागि फोन वार्ता गर्ने क्रममा थापाले गाली गलौज सहित अभद्र ब्यवहार गरेका थिए । यस्तै थापाका छोरा अभिषेकले तिमल्सिनासँग थापाथलीस्थित कार्यालय परिषरमै गएर वादविवाद गरेका थिए ।
'समाचार संकलनका लागि गालीगलौज र अभद्र व्यवहार तथा उनका छोराले गरेको वादविवादको घटनाप्रति घोर भर्त्सना गर्दै स्वतन्त्र पत्रकारिता रक्षाको लागि माग गर्दछौ,' विज्ञप्तिमा भनिएको छ ।
यस्तै एनएसजेएफ गण्डकीले आगामी दिनमा यसप्रकारका निन्दनीय क्रियाकलाप नदोहोर्याउन चेतावनी दिँदै खेल पत्रकारसहित सिंगो स्वतन्त्र पत्रकारिता रक्षाको प्रत्याभूति दिलाउन सम्बन्धित संघ, प्रदेश र स्थानीय सरकारसँग माग गरेको छ ।
-1736559847.jpg)
