काठमाडौं । टेबल टेनिसको प्रशिक्षण गराउने एनीज पिङपङ क्लब ललितपुरको धोबीघाटमा सञ्चालनमा आएको छ ।
राष्ट्रिय खेलाडी अनिता महर्जनले सूरुवात गरेको एनीज पिङपङ धोबीघाटमा समेत विस्तार गरिएको हो ।
धोबीघाटस्थित लाइफ स्कुलले अनितासँगको सहकार्यमा टेबल टेनिसको प्रशिक्षण क्लब सञ्चालन गर्ने भएको छ ।
स्कुलकी फाउन्डर ईन्चार्ज महेश्वरी अमात्य र एनीज पिङपङकी प्रबन्ध निर्देशक अनिता महर्जनले आईतबार क्लबको संयुक्त उद्घाटन गरेका छन् ।
फाउन्डर ईन्चार्ज अमात्यले विद्यार्थीलाई टेबल टेनिसको प्रशिक्षण दिन एनीज पिङपङसँग सहकार्य गरिएको बताईन् ।
तीन वटा बोर्ड राखेर क्लब सञ्चालन गरिने बताईएको छ ।
टेबल टेनिसकी राष्ट्रिय खेलाडी अनिताले व्यक्तिगत लगानीमा एनीज पिङपङ क्लबको सुरुवात गरेकी हुन् ।
अनिताले देशभर विभिन्न विद्यालयमा रहेका विद्यार्थीमा टेबल टेनिसप्रति इच्छा जगाउन नयाँ सुरुवात गरिएको बताएकी छिन् । उनले क्लबको विस्तार कार्यलाई देशभर लैजाने समेत उल्लेख गरिन् ।
अनिताले भर्खरै टेबल टेनिसको प्रशिक्षकको लेभल टु कोर्स समेत पास गरेकी छिन् । एकेडेमी सञ्चालन गरेर देशभर टेबल टेनिसको प्रचार र विस्तारमा लाग्ने उनको योजना छ ।
