काठमाडौं । अखिल नेपाल फुटबल संघ एन्फाले विभिन्न उमेर समुहका प्रतियोगिताका लागि खेलाडीको खुल्ला छनोट गर्ने भएको छ । उमेर समुहको दक्षिण एसियाली फुटबल प्रतियोगिता र एसियाली फुटबल प्रतियोगिता खेल्न एन्फाले खेलाडीको खुल्ला छनोट गर्ने भएको हो ।
एन्फाका महासचिव ईन्द्रमान तुलाधरले साफ र एएफसीको प्रतियोगितामा बलियो उपस्थिती जनाउन फागुनको पहिलो साताबाट खेलाडीको खुल्ला छनोट गर्न लागिएको खेलपाटीलाई बताए ।
एन्फाका अनुसार पुरुषमा यु १५ र यु १६ तथा महिलामा यु १५ को टिमका लागि खेलाडी छनोट गरिनेछ ।
नेपालले यसै बर्ष अगष्ट ४ देखि १३ सम्म पुरुषको साफ यु १५ र सेप्टेम्बर १४ देखि २२ सम्म एएफसीको यु १६ प्रतियोगिता खेल्दैछ ।
यस्तै, महिलातर्फ अक्टोबर ९ बाट १८ सम्म साफको यु १५ प्रतियोगिता खेल्दैछ ।
एन्फाले संघमा आबद्व जिल्ला फुटबल संघलाई पत्र लेख्दै उमेर समुहका खेलाडी छनोट गरि खेलाडीको प्रशिक्षण सुरु गर्न अनुरोध गरिसकेको छ ।
महिलाको साफ यु १५ प्रतियोगिताका लागि २०६२ पुुस १७ पछि र २०६२ पुस १६ अघि जन्मेको हुनुपर्ने एन्फाले जनाएको छ ।
त्यस्तै साफ यु १५ र एएफसी यु १६ कालागि २०६० पुस १७ गतेपछि र २०६१ पुस १६ गते अघि जन्मेको हुनुपर्ने छ ।
महासचिव तुलाधरको अनुसार एन्फामा उमेर समुहको प्रतियोगिता खेल्न करिब ११ खेलाडी रहेका छन् । अन्तिम छनोटमा एन्फा र जिल्लाबाट आएका खेलाडीलाई समावेश गरिनेछ ।
