काठमाडौं । अखिल नेपाल फुटबल संघ एन्फाका ९ जना पदाधिकारी सहितका सदस्यले कार्यसमिति बैठकको अवैधानिक निर्णय उपर अदालतसम्म जाने धम्की दिएका छन् ।
सोमबारको कार्यसमिति बैठकका ६ वटा निर्णय विधान विपरित रहेको भन्दै वरिष्ठ उपाध्यक्ष वीरबहादुर खड्का सहित ९ जना पदाधिकारीले मंगलबार पत्रकार सम्मेलनको आयोजना गरेर एन्फा निर्णयको विरोध गरेका हुन् ।
उनीहरुले निर्णय उपर एन्फाको अनुशासन समिति, राखेप र अदालतसम्म जाने बताएका हुन् ।
कार्यसमिति बैठकको निर्णयमा असन्तुष्टि जनाउनेमा वरिष्ठ उपाध्यक्ष खड्का, उपाध्यक्षद्धय दिर्घबहादुर केसी कुमार, विराटजंग शाही, पेमा डोल्मा लामा, रमेश ब्यञ्जनकार, अनिल मल्ल, भोजराज शाही, रवीन्द्र चन्द र रुपेश अधिकारी छन् ।
मध्यपुर युथलाई कारबाही गर्ने निर्णय न्यायोचित नभएको, इन्द्रमान तुलाधरलाई सिइओ नियुक्त गर्ने निर्णय अवैधानिक भएको, महिला समितिलाई बैठकमा समावेश नगरिएको, विधान विपरित राष्ट्रिय लिग खेल्ने ४ क्लबको मताधिकार खोसेको, सहायक महासचिव बसन्त अर्याललाई हटाउने निर्णय विधि अनुसार नभएको र विधान विपरित इन्ट्रिगिटी अफिसर नियुक्त गरिएको आरोप लगाईएको छ ।
उनीहरुले बहुमतका आधारमा गरिएको अवैधानिक निर्णयलाई लिएर राखेपदेखि अदालतसम्म जाने बताएका छन् ।
‘अध्यक्षले बहुमतको आधारमा निर्णय गर्नुभएको छ । तर कतिपय निर्णय विधि, विधान विपरित देखिन्छ ।’ वरिष्ठ उपाध्यक्ष खड्काले भने, ‘अनुशासनको कारबाही भोग्न परेपनि यस विषयमा अदालतसम्म पुग्नेछौं ।’
उपाध्यक्ष दिर्घबहादुर केसी कुमारले बहुमतका आधारमा विधि र विधान मिच्ने काम नेतृत्वबाट भएको उल्लेख गर्दै अवसरवादीहरुको झुण्ड बोकेर फुटबलको लामो यात्रा तय गर्न नसकिने बताए ।
अर्का उपाध्यक्ष विराटजंग शाहीले जिम्मेवारी दिने र खोस्ने विषयमा नेतृत्वले स्पष्ट कारण दिन सक्नुपर्ने बताए ।
केन्द्रिय सदस्य अनिल मल्लले एन्फाका अवैधानिक निर्णयविरुद्ध आफुले सधै बोल्दै आएको उल्लेख गर्दै विधान अनुसार संस्था चल्नुपर्ने बताए ।
अर्का केन्द्रिय सदस्य रुपेश केसीले बहुमतको नाममा गोप्य कोठाबाट फुटबल चलाउन खोजिएको आरोप लगाए ।
एन्फाको सोमबारको कार्यसमिति बैठकले १४ वटा निर्णयलाई प्रेस बिज्ञप्तिमार्फत सार्वजनीक गरेको थियो । तर सिइओ नियुक्ति लगायतका कतिपय निर्णय एन्फा विधान, नियमावली विपरित देखिएका छन् । सोही निर्णयविरुद्ध ९ जना कार्यसमितिका पदाधिकारी र सदस्य विरोधमा उत्रिएका हुन् ।
