काठमाडौं । शारीरिक सुगठनमा स्वर्ण पदक विजेता महेश्वर महर्जनलाई पुर्व प्रधानमन्त्री एवंम नेकपाका अध्यक्ष पुष्पकमल दाहाल प्रचण्डले बधाई दिएका छन् । आफ्नै निवास खुमलटार बोलाएर अध्यक्ष दाहालले हालै भएको विश्व शारीरिक सुगठनमा स्वर्ण पदक जितेका महर्जनलाई बधाई तथा शुभकामना दिएका हुन् ।
अध्यक्ष दाहालले प्रतियोगितामा प्राप्त सफलताले देशको गौरव उँचो पार्न सहयोग गरेको भन्दै बधाई दिएका हुन् ।
'तपाईले उत्कृष्ट कौशल देखाउनु भयो । यसबाट नेपाल र नेपालीको शीर गौरवले उच्च भएको छ ।' अध्यक्षले दाहालले भने, 'विश्वस्तरको प्रतियोगितामा नेपालका तर्फबाट तपाईको प्रस्तुतीले नेपाली पनि अवसर पाए कम छैन भन्ने स्पष्ट पारेको छ ।'
आफूले खेल क्षेत्रलाई सधैं प्राथमिकतामा राखेको भन्दै अध्यक्ष दाहालले नेपालको समृद्धि र विकासमा खेल क्षेत्र र खेलाडीहको ठूलो भूमिका रहने बताए । राष्ट्रिय एकता तथा विश्वका अगाडि नेपाललाई चिनाउन खेल क्षेत्रको ठूलो भूमिका रहेको बताउँदै अध्यक्ष दाहालले पार्टी र सरकारका तर्फबाट शारीरिक सुगठनलगायत नेपालको खेल क्षेत्रलाई अझ विकास गर्ने धारणा राखे ।
खेलाडी महर्जनजले व्यक्तिगत लगानी र प्रयासमा ७५ किलो तौल समूहमा स्वर्ण पदक जितेको बताउँदै यस क्षेत्रमा राज्यले नै सहयोगी वातावरण बनाइदिन आग्रह गरेका थिए । उनले अध्यक्ष दाहाल सामु मिस्टर युनिभर्समा समेत सहभागी हुने इच्छा व्यक्त गरेका थिए ।
अध्यक्ष दाहालले सरकार र पार्टीका तर्फबाट महर्जनको खेल जीवनलाई अझै विकास गर्न आवश्यक सहयोगका लागि पहल गर्ने बताएको अध्यक्ष दाहालको नीजि सचिवालयले जनाएको छ ।
-1752846588.jpeg)
